აჭარის კონტროლის პალატამ სახელმწიფო საწარმოების მუშაობაში გარკვეული დარღვევები აღმოაჩინა. კონტროლის პალატის ინფორმაციით დარღვევები აღმოჩენილია შპს „ქედის ავტოსატრანსპორტო საწარმოსა" და შპს "შუახევის ავტოსატრანსპორტო საწარმოში", ასევე დარღვევებია აღმოჩენილი შპს „ბათუმის ელექტრომექანიკური და ლითონკოსტრუქციების საწარმოო გაერთიანებაში" და შპს „ქობულეთის სამგზავრო ავტოსადგურში".
აჭარის კონტროლის პალატის, 2010 წლის ანგარიში წერია, რომ შპს "ქედის ავტოსატრანსპორტო საწარმოს" მიერ გაწეული სარემონტო-სარეაბილიტაციო დანახარჯები ასახულია მიმდინარე ხარჯებში, შესაბამისად არ არის გაზრდილი ძირითადი საშუალებების საბალანსო ღირებულება 3621 ლარით. ბიუჯეტში გადახდილი 13281 ლარი საშემოსავლო გადასახადი არასწორად არის მიკუთვნებული ხარჯებზე. რომ არა ასეთი მიდგომა, საანგარიშო წელი ნაცვლად ზარალისა, მცირე, მაგრამ მაინც მოგებით დასრულდებოდა. პალატის ინფორმაციითვე, სხვაობაა შპს "ქედის ავტოსატრანსპორტო საწარმოსა" და შპს „შუახევის ავტოსატრანსპორტო საწარმოს" ბალანსზე რიცხულ ავტოსატრანსპორტო საშუალებებსა და საქართველოს შსს მომსახურების სააგენტოს დასავლეთ საქართველოს სამმართველოს ბათუმის განყოფილებაში არსებულ მონაცემებს შორის.
რაც შეეხება შპს „ბათუმის ელექტრომექანიკური და ლითონკოსტრუქციების საწარმოო გაერთიანებას" აქ საბალანსო მონაცემები არ შეესაბამება რეალობას. ძირითადი ფონდების საიჯარო გადასახადის სახით მიღებული 14181 ლარის შემოსავლების ნაცვლად, ბალანსში აღრიცხულია 4507 ლარის შემოსავალი. ეს მოხდა რეალიზაციიდან მიღებული შემოსავლების საბალანსო მონაცემების გაზრდის ხარჯზე. მნიშვნელოვანი დარღვევები ფიქსირდება საიჯარო ხელშეკრულებებში, რომელიც ეხება შენობა-ნაგებობებისა და მიწის ნაკვეთის იჯარით გაცემას. შვიდ შემთხვევაში კი საიჯარო ხელშეკრულებები საერთოდ ვერ იქნა წარმოდგენილი. მისი საქმიანობიდან გამომდინარე, 2009 წელი 124 323 ლარის ზარალით დაამთავრა. აჭარის კჯონტროლის პალატის ანგარიშში ნათქვამია ასევე, რომ შპს „ქობულეთის სამგზავრო ავტოსადგურის" მიერ წარმოდგენილი ფინანსური ანგარიშები ზუსტად არ ასახავს შპს „ქობულეთის სამგზავრო ავტოსადგურში" არსებულ რეალურ ფინანსურ შედეგებს.