სახელმწიფო ბიუჯეტში მაკროეკონომიკური პარამეტრების მაქსიმალური ზღვრები დაწესდება. აღნიშნულის შესახებ ნათქვამია "ეკონომიკური თავისუფლების, შესაძლებლობებისა და ღირსების" შესახებ კანონპრექტში.
საკანონმდებლო ინიციატივაში განმარტებულია, რომ ეკონომიკის გრძელვადიანი და სტაბილური ზრდის საშუალებით კეთილდღეობის უზრუნველსაყოფად და ყოველი შემდგომი თაობისთვის სამართვად შემცირებული ფინანსური ვალდებულებების მქონე ქვეყნის გადაცემის ხელშეწყობის მიზნით, დგინდება მაკროეკონომიკური პარამეტრების შემდეგი მაქსიმალური ზღვრები.
კერძოდ, კონსოლიდირებული ბიუჯეტის შეფარდება მთლიან შიდა პროდუქტთან უნდა იყოს არა უმეტეს 30%-ისა; კონსოლიდირებული ბიუჯეტის დეფიციტის შეფარდება მთლიან შიდა პროდუქტთან არა უმეტეს 3%-ისა და სახელმწიფო ვალის შეფარდება მთლიან შიდა პროდუქტთან არაუმეტეს 60%-ისა;
თუ საქართველოს პარლამენტის მიერ დამტკიცებული ბიუჯეტი არ შეესაბამება აღნიშნულ ზვარს ან/და ზღვრებს, საქართველოს მთავრობა ვალდებულია შეიმუშაოს და საქართველოს პარლამენტს დასამტკიცებლად წარუდგინოს შემდგომი ორი წლის ბიუჯეტის პარამეტრები, რომელიც უნდა ითვალისწინებდეს მოცემულ პერიოდში დადგენილ ზღრებში დაბრუნების გეგმას.
სახელმწიფო, ავტონომიური რესპუბლიკებისა და ადგილობრივი თვითმმართველი ერთეულების ბიუჯეტების დადგემვა უნდა მოხდეს პროგრამულ საფუძველზე მიზნებისა და ამოცანების შესაბამისად.
აღნიშნული კანონი ძალაში შევა 2013 წლის 31 დეკემბრიდან.