სახელმწიფო ქონების აუქციონზე გაყიდვისას გადახდის ხარვეზის არსებობის შემთხვევაში, მყიდველისთვის დამატებითი ვადა დაწესდება. აღნიშნულთან დაკავშირებით ცვლილება შედის "სახელმწიფო ქონების შესახებ" კანონში.
კანონპროექტის თანახმად, აუქციონისას, გადახდის ხარვეზის არსებობის შემთხვევაში, მყიდველისთვის დამატებითი, 10-დღიანი ვადა დაწესდება, რათა მყიდველმა საპრივატიზებო თანხა სრულად გადაიხადოს.
"აუქციონის პროცესში თანხის გადახდის ან გადარიცხვის დროს წარმოშობილი პრობლემის გამო, რის შედეგადაც საპრივატიზებო საფასურის სრულ ოდენობას აკლდება მცირეოდენი თანხები და დამატებითი ვადის დაწესების საშუალების არარსებობის გამო, აუქციონის შედეგები უქმდება. ეს კი უარყოფით შედეგებს იწვევს როგორც კეთილსინდისიერი მყიდველისთვის, ასევე პრივატიზების პროცესისთვის", - ნათქვამია პროექტის განმარტებით ბარათში.
ცვლილებების თანახმად, აუქციონი მხოლოდ იმ შემთხვევაში გაუქმდება, თუ აუქციონში გამარჯვებულმა პრივატიზების განმახორციელებელი ორგანოს მიერ განსაზღვრულ ვადაში სრულად არ გადაიხადა საპრივატიზებო საფასური და პრივატიზების განმახორციელებელი ორგანოს მიერ გადახდის ხარვეზის შევსებისთვის დამატებით დაწესებულ 10-დღიან ვადაში, არ გადაიხადა და არ წარმოადგინა საპროვატიზებო საფასურის სრულად გადახდის დამადასტურებელი დოკუმენტი.
გადახდის ხარვეზის შესახებ ინფორმაცია პრივატიზების განმახორციელებელი ორგანოს ვებგვერდზე გამოქვეყნდება და დამატებითი ვადის ათვლად, გამოქვეყნების დღე დაწესდება.
