დღესვე ქობალია მინისტერიალის ფარგლებში უცხოელ კოლეგებს შეხვდა. საქართველოს ეკონომიკისა და მდგრადი განვითარების მინისტრმა ასევე სამინისტროში ორმხრივი შეხვედრები გამართა ვიეტნამის და ბოსნია-ჰერცეგოვინას ტრანსპორტის მინისტრებთან. საუბარი ტრანსპორტის, მათ შორის ავიაციის სფეროში თანამშრომლობის კუთხით რამდენიმე კონკრეტულ საკითხს შეეხო, კერძოდ, ვიეტნამის ტრანსპორტის მინისტრმა ჰო ნგჰია დუნგიმ ვიეტმნამსა და საქართველოს შორის პირდაპირი ავიამიმოსვლის საკითხი დააყენა, როგორც მან აღნიშნა, პირდაპირი ავიარეისის არსებობა ორივე ქვეყანაში შეუწყობს ხელს ვაჭრობისა და ტურიზმის განვითარებას. კოლეგებთან შეხვედრების შემდეგ კი ვერა ქობალიამ აღნიშნა, რომ ორივე ქვეყანას დიდი ინტერესი აქვს, საქართველოს სატრანზიტო დერეფანი მათ მიერ მეტად იქნას გამოყენებული.

კონფერენცია ორი დღის განმავლობაში იმუშავებს და მისი მიმდინარეობისას ყურადღება დაეთმობა კავკასიის რეგიონში ტრანსპორტთან დაკავშირებულ საკითხებს და დიდი აბრეშუმის გზის გასწრივ საჭირო სატრანსპორტო ინფრასტრუქტურის განვითარების აუცილებლობას. ამასთან, როგორც ვერა ქობალიამ მედიისთვის გაკეთებულ კომენტარში აღნიშნა, კონფერენციის მიმდინარეობისას განხილულ იქნება საქართველოს, როგორც ევროპისა და აზიის დამაკავშირებელი ქვეყნის სტრატეგიული როლი სატრანსპორტო, მათ შორის როგორც სახმელეთო, ისე საჰაერო და საზღვაო ტრანსპორტის სფეროში. ‘საუბარი შეეხება, თუ უფრო ეფექტურად როგორ შეიძლება ამ მხრივ საქართველოს სატრანსპორტო მიმართულებების გამოყენება, მათი დაკავშირება სხვა ქვეყნებთან~, - განაცხადა ეკონომიკისა და მდგრადი განვითარების მინისტრმა.

ორდღიანი კონფერენციის ფარგლებში 17 ივნისს ხელი მოეწერება დეკლარაციის აზიასა და ევროპას შორის საავტომობილო გადაზიდვების განვითარების, ევრაზიის რეგიონში ვაჭრობისა და ტვირთების ტრანსპორტირების საკითხებთან დაკავშირებით.