საერთაშორისო რეზერვების მართვის ახალი სისტემის დანერგვით დასრულდა ეროვნული ბანკის სისტემური და ინფრასტრუქტურული რეფორმის მნიშვნელოვანი ეტაპი
ეროვნულ ბანკში სისტემური რეფორმების აქტიური ფაზა 2008 წლიდან დაიწყო.

2009 წელს აშშ-ის განვითარების სააგენტომ საქართველოს ეროვნულ ბანკს 3.29 მლნ აშშ დოლარის გრანტი გამოუყო, ეს იყო დახმარება საქართველოს ეროვნული ბანკის სისტემური და ინსტიტუციონალური განვითარებისათვის. ერთდროულად დაიწყო რამდენიმე მასშტაბური პროექტის განხორციელება, რაც რადიკალურად ცვლიდა ანგარიშსწორების, საგადახდო, ფასიანი ქაღალდების და საერთაშორისო რეზერვების მართვის სისტემებს.

სებ-ის პრეზიდენტის გიორგი ქადაგიძის განცხადებით, 2009 წლის 28 მაისს, როდესაც ეროვნულ ბანკში 3,5 მლნ. დოლარის გადაცემის შესახებ ხელშეკრულებას მოეწერა ხელი, რომელიც თავის მხრივ ეროვნული ბანკის ინსტიტუციონალურ განვითარებას ეხებოდა, მაშინ ბევრმა სებ-ის გეგმები საკმაოდ ამბიციურად მიიჩნია.

"სავალუტო რეზერვების მართვის სისტემა - ეს არ არის მარტო სებ-ის პრესტიჟის საკითხი, ეს არის მთლიანად ქვეყნის რეპუტაციისა და პრესტიჟის საკითხი. დღეს თამამად შემიძლია განვაცხადო, რომ გვაქვს ერთ-ერთი ყველაზე თანამედროვე, უსაფრთხო, მოქნილი და ანალიტიკურად გამართული სისტემა. ქვეყნის ფინანსური სტაბულირობა მყარი მექანიზმებით უნდა იყოს უზრუნველყოფილი. უნდა აღვნიშნო, რომ მაშინ ყველას, მათ შორის ჩვენს ამერიკელ კოლეგებსა და მეგობრებსაც ზედმეტად ოპტიმისტურად და ამბიციურად ეჩვენებოდათ ჩვენი გეგმა. თუმცა, დღეს საერთაშორისო რეზერვების მართვის სისტემის დანერგვით პროცესი მთლიანად დასრულდა. ეს სისტემა მსოფლიოს 30 განვითარებულ ქვეყანაში არსებობს და განსაკუთრებული სიამაყით მინდა აღვნიშნო, რომ საქართველოს ეროვნული ბანკი არის პირველი ცენტრალური ბანკი, რომელმაც ასე სწრაფად, წელიწადნახევარში დანერგა სისტემა", - განაცხადა ეროვნული ბანკის პრეზიდენტმა გიორგი ქადაგიძემ.

აშშ-ის ელჩის მოვალეობის შემსრულებელი საქართველოში კენტ ლოგსდონი კი აცხადებს, რომ საქართველოსთვის საერთაშორისო რეზერვების მართვის უსაფრთხო და თანამედროვე სისტემის დანერგა მნიშვნელოვანი ნაბიჯია.

"კარგად მახსოვს ომის შემდგომი თვეები, როდესაც საელჩოში ვმსჯელობდით იმაზე, თუ როგორ უნდა განკარგულიყო ის 1 მლრდ. დოლარიანი პაკეტი, რომელიც მაშინ გამოიყო. იყო მსჯელობა იძულებით გადაადგილებული პირების დახმარებაზე, და სხვა მხრივ თანხების განკარგვაზე. სწორედ ამ დროს ჩვენთან შემოვიდა საელჩოს მრჩეველი ფინანსთა საკითხებში, რომელმაც გვითხრა რომ საქართველოში მნიშვნელოვანია ბანკები და მათი უსაფრთხოება და ეს არის ის თემა რაზეც ჩვენ აუცილებლად უნდა ვიზრუნოთო. სწორედ ბევრი მუშაობის წყარობით შემუშავდა ცვლილებათა პაკეტი, რაც გახდა საწინდარი იმ ცვლილებებისა რომლითაც საბანკო სისტემის უსაფრთხოება უნდა განხორციელებულიყო.

სისტემა უზრუნველყობს იმას, რომ საქართველოს ეროვნულმა ბანკმა განახორციელოს მონისტორინგი საქარევეოში უცხორი რეზერვების მართვაზე და ფინანსურ აქტივებზე. ის უზრუნლეყუობს ასევე აქტივების მართვას", - განაცხადა აშშ-ის ელჩის მოვალეობის შემსრულებელმა საქართველოში კენტ ლოგსდონიმ.

სებ-ის ინფორმაციით, საქართველოს საერთაშორისო რეზერვებმა ისტორიულ მაქსიმუმს მიაღწია და 2.7 მილიარდ აშშ დოლარს გაუტოლდა. დადგა დახვეწილი, მთლიანი საინვესტიციო ციკლის ავტომატიზებული მართვის სისტემების დანერგვის აუცილებლობა. საერთაშორისო რეზერვების მართვის ახალი სისტემა უზრუნველყოფს ოპერატიულობას და ეფექტურობას, ამცირებს საოპერაციო რისკებს და ზრდის რეზერვების შემოსავლიანობას.
საერთაშორისო რეზერვების მართვის სისტემის დანერგვაში ეროვნულ ბანკს დახმარებას უწევდა აშშ-ის ხაზინის ექსპერტი, მსოფლიო ბანკი, ჰოლანდიის ცენტრალური ბანკი. ანალოგიური სისტემა მუშაობს 30 ცენტრალურ ბანკში, მათ შორის: გერმანიის, საფრანგეთის, ჰოლანდიის, იტალიის, ისრაელის, პოლონეთის ცენტრალურ ბანკებში.