სურსათის ეროვნული სააგენტოს ინფორმაციით, პარლამენტში წარდგენილი კანონპროექტის შესაბამისად ,,ადმინისტრაციულ სამართალდარღვევათა კოდექსში'' შედის ცვლილებები, რომლის მიხედვითაც საჯარიმო სანქციები ამოქმედდება სურსათის/ცხოველის საკვების მწარმოებელთა და დისტრიბუტორთათვის. კერძოდ: პირის საქმიანობა სურსათის/ცხოველის მწარმოებელ საწარმოდ ან დისტრიბუტორად რეგისტრაციის გარეშე გამოიწვევს მის დაჯარიმებას 300 ლარის ოდენობით.
ზემოაღნიშნული ცვლილება სურსათის/ცხოველის საკვების ყველა საწარმოსათვის ძალაში შევა გამოქვეყნებისთანავე. სააგენტოს უფლებამოსილი მოხელის მიერ არაკრიტიკული შეუსაბამობის დროს გაცემული რეკომენდაციის შეუსრულებლობისას ჯარიმა განისაზღვრება 400 ლარის ოდენობით, ხოლო იმავე რეკომენდაციის კვლავ შეუსრულებლობის შემთხვევაში სანქცია გასამმაგდება. რეგისტრირებულ საწარმოში კრიტიკული შეუსაბამობის აღმოჩენის შემთხვევაში საწარმო დაჯარიმდება 1000 ლარით და საწარმოო პროცესი შეუჩერდება კრიტიკული შეუსაბამობის გამოსწორებამდე. სააგენტოს უფლებამოსილ პირთან თანამშრომლობაზე უარის თქმა ან შემოწმების პროცესში მისთვის სხვაგვარად ხელის შეშლა გამოიწვევს ბიზნესოპერატორის დაჯარიმებას 400 ლარის ოდენობით.
აღნიშნული, ცვლილებები ევროკავშირში ექსპორტიორი საწარმოებისათვის ძალაში შევა გამოქვეყნებისთანავე, ხოლო ყველა სხვა სურსათის/ცხოველის საკვების საწარმოებისათვის 2012 წლის 3 იანვრიდან.
იმავდროულად, სურსათის ეროვნული სააგენტო გამოხატავს მზადყოფნას ითანამშრომლოს ყველა ბიზნეს-ოპერატორთან და მომართვის შემთხვევაში განუმარტოს და მოახდინოს რეკომენდაციების გაცემა დაინტერესებული მხარეებისათვის