14 ივნისს, 12:00 საათზე, არნოლდ ჩიქობვას სახელობის ენათმეცნიერების ინსტიტუტის სხდომათა დარბაზში ინსტიტუტის 70 წლისთავისადმი მიძღვნილი საიუბილეო ღონისძიება გაიმართება.
როგორც "ჯი-ეიჩ-ენს" ენათმეცნიერების ინსტიტუტიდან აცნობეს, ღონისძიებაზე მიწვეულნი არიან საქართველოს პრეზიდენტის ადმინისტრაციის, პარლამენტის, განათლებისა და მეცნიერების სამინისტროს წარმომადგენლები. ასევე უნივერსიტეტების, მეცნიერებათა აკადემიისა და კვლევითი ცენტრების წარმომადგენლები.
საიუბილეო ღონისძიებაზე სიტყვით მისალმებებით გამოვლენ: პარლამენტარი ნუგზარ წიკლაური, განათლებისა და მეცნიერების მინისტრის მოადგილე ნოდარ სურგულაძე, აკად. თამაზ გამყრელიძე, ცნობილი მუსიკოსი და ენათმეცნიერი ნოდარ ანდღულაძე და სხვა ცნობილი მოღვაწენი.
ღონისძიებაზე 10 დამსახურებულ და მხცოვან ენათმეცნიერს ენათმეცნიერების ინსტიტუტში გაწეული მოღვაწეობისათვის საიუბილეო მედლები გადაეცემა.
ასევე, გაიმართება ინსტიტუტის მიერ 70 წლის განმავლობაში გამოქვეყნებული წიგნებისა და კრებულების გამოფენა.