ნებისმიერი საგადასახადო ვალდებულების შესახებ ინფორმაციის მიღება ბანკებში გახდება შესაძლებელი. აღნიშნულთან დაკავშირებით ცვლილებები შედის "საგადასახადო კოდექსში".
კანონპროექტის თანახმად, პირის, რომელსაც საგადასახადო ვალდებულება ან საურავები აქვს დარიცხული საშუალება მიეცემა მათი ოდენობის შესახებ ინფორმაცია მიიღოს კომერციული ბანკების საშუალებით ნებისმიერი საბანკო ოპერაციის შესრულების დროს.
როგორც მთავრობის საპარლამენტო მდივანმა გია ხუროშვილმა დღეს, დარგობრივი ეკონომიკისა და ეკონომიკური პოლიტიკის კომიტეტზე საკითხის განხილვის დროს განმარტა, ხშირია შემთხვევა, როდესაც პირმა არ იცის მასზე დაკისრებული საგადასახადო ვალდებულების შესახებ, რის გამოც საურავები ერიცხება.
მისივე თქმით, აღნიშნული ცვლილების შემდეგ დაინტერესებული პირისთვის საგადასახადო ვალდებულების არსებობის შესახებ ინფორმაცია უფრო ხელმისაწვდომი და მარტივი გახდება.
