11 ივნისს, 18:00 საათზე ყოფილი საბაგიროს შენობაში (რუსთაველის გამზირი #52) გაიმართება ზაფხულის ტურისტული სეზონის გახსნის ღონისძიება, რომლის ფარგლებშიც მოეწყობა საქართველოს ტურისტული პოტენციალის ამსახველი ფოტო-გამოფენა. ღონისძიებას დაესწრება საქართველოს ეკონომიკისა და მდგრადი განვითარების მინისტრი ვერა ქობალია.
პროექტის ძირითად მიზანს წარმოადგენს საქართველოში ზაფხულის სეზონის ტურისტული აქტივობების პოპულარიზაცია, არსებული რესურსის გაცნობა და ზაფხულის განმავლობაში საქართველოს სხვადასხვა კუთხეებში მოგზაურობის სურვილის დანერგვა.
ღონისძიების სლოგანია „შემოიარე საქართველო", სწორედ ამ სლოგანის გასამართლებლად პანორამული ფოტოების გაყოლებაზე დამაგრდება ‘ფეხების' ინსტალაცია (ავტორი ირინკა გაჩეჩილაძე), რომელიც თემატურად პირდაპირ კავშირშია საზაფხულო ტურისიტული სეზონის გახსნასთან და მის სლოგანთან.
ასევე მოეწყობა მსოფლიოში ცნობილი სატელევიზიო არხის - "Travel Channel" - ის მიერ ქართული ღვინის შესახებ გადაღებული ფილმის - That Crazy French Woman in Georgia-ს პრეზენტაცია, რომლის ავტორიც იზაბელ ლეგერონი სპეციალურად ამ საღამოსთვის ჩამოფრინდება ლონდონიდან. მოეწყობა კახეთის სხვადასხვა კუთხის საპრეზენტაციო ღვინოების კუთხეც.
საღამოს მასპინძელი საქართველოს ტურიზმის ეროვნული საგენტოს თავმჯდომარე მაია სიდამონიძე მიესალმება დამსწრე საზოგადოებას და ოფიციალურად გახსნის ზაფხულის ტურისტულ სეზონს. იგი მოწვეულ სტუმრებს საქართველოს ტურიზმის სფეროში მიღწეული წარმატებების, ზაფხულის ტურისტული აქტივობების შესახებ უამბობს და გააცნობს ამავე სფეროს სამომავლო გეგმებს.
ასევე აღსანიშნავია, რომ Travel Channel-ი თავისი ახალი სატელევიზიო გადაცემისათვის ESSENTIAL აპირებს კიდევ ერთი სერიის გადაღებას. ეს გადაცემა ორიენტირებულია, რომ აღმოაჩინოს და მაყურებელს გააცნოს ის საუკეთესო საშუალებები და დასასვენებელი ადგილები, სადაც თითოეული მათგანი შესძლებს დროის განუმეორებლად გატარებას და საუცხოოდ დასვენებას. ამჯერად ამ არაჩვეულებრივი სატელევიზიო გადაცემის კიდევ ერთი სერიის გადაღება, რომელსაც Essential Georgia ერქმევა - საქართველოში იგეგმება.
