საქართველოს 24-საათიანი წყალმომარაგების პრობლემა 2013 წლისთვის გადაიჭრება. ამის შესახებ რეგიონალური განვითარებისა და ინფრასტრუქტურის მინისტრმა რამაზ ნიკოლეიშვილმა სამეგრელოში, პრეზიდენტ სააკაშვილსა და რეგიონების რწმუნებულებს შორის შეხვედრაზე განაცხადა.
მისი განმარტებით, წყალმომარაგებაზე წელს სოლიდური თანხები დაიხარჯება.
„წელს ვიწყებთ ამ პრობლემის მოგვარებას მესტიაში, ფოთში, ზუგდიდში, მარნეულში. აქამდე პრობლემა იყო ის, რომ ვაკეთებდით მხოლოდ წყალს, ან მხოლოდ კანალიზაციას. რეალურად, საკანალიზაციო სისტემა თბილისის გარდა თითქმის არსად იყო", - აღნიშნა მინისტრმა.
ნიკოლეიშვილის თქმით, წყალმომარაგების პრობლემა უკვე ნაწილობრივ გადაჭრილია ქუთაისში, ბორჯომსა და ბაკურიანში.
„ქუთაისში წაყლი იყო ხოლმე სამ დღეში ერთხელ ორი საათით, ახლა ყოველდღე 7- საათიანი გრაფიკითაა. რამდენიმე რაიონს კი, მათ შორის ავტოქარხანასა და გორას დასახლებას, სადაც პარლამენტი შენდება, 24-საათიანი წყამომარაგება მიეწოდება. ასევე საკმაოდ მნიშვნელოვანი პრობლემები გადაიჭრა ბაკურიანსა და ბორჯომში, სადაც 24-საათიანი მომარაგება უკვე მოსახლეობის 70 %-ს აქვს. ახლა წყლისგამწმენდ ნაგებობასაც ვაშენებთ", - აღნიშნა მინისტრმა.
რაც შეეხება წყალტუბოს, ნიკოლეიშვილის განმარტებით, რაიონის იმ ადგილებს, სადაც სასტუმროებია განთავსებული, 24-საათიან რეჟიმში წყალმომარაგება მიმდინარე წლის აგვისტოდან ექნება, მთლიანად წყალტუბოში კი პრობლემა 2013 წლის დასაწყისისთვის გადაიჭრება.