აღნიშნულთან დაკავშირებით ცვლილება შედის "საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ" კანონში შედის.

დღეს არსებული რეგულაციით, საცხოვრებელი ადგილის მიხედვით რეგისტრაციის გავლა და პირადობის (ბინადრობის) მოწმობის აღება 14 წლამდე საქართველოს მოქალაქეს და საქართველოში მცხოვრებ უცხოელს მხოლოდ სურვილის შემთხვევაში შეუძლია და მისი აღების ვალდებულება არ ეკისრება.

კანონპროექტის თანახმად კი, პირადობისა და ბინადრობის მოწმობების ერთმანეთისგან გამიჯვნა ხდება და 14 წლის ასაკის საქართველოს მოქალაქეს პირადობის მოწმობის აღების ვალდებულება ემატება. აღნიშნული მუხლი საკანონმდებლო ინიციატივაში შემდეგნაირად არის ფორმულირებული: "საქართველოს მოქალაქე 14 წლის ასაკის მიღწევიდან 6 თვის ვადაში ვალდებულია მიიღოს პირადობის მოწმობა. პირადობის მოწმობის აღება სურვილისამებრ შეუძლია ასევე 14 წლამდე ასაკის საქართველოს მოქალაქეს".

გარდა ამისა, მოქმედი კანონმდებლობით, საქართველოს მოქალაქე და საქართველოში მცხოვრები უცხოელი 14 წლის ასაკიდან არა უგვიანეს 6 თვისა, ვალდებული არიან, გაიარონ რეგისტრაცია საცხოვრებელი ადგილის მიხედვით.

14 წლის ასაკს მიღწეული პირის რეგისტრაცია საცხოვრებელი ადგილის მიხედვით და პირადობის (ბინადრობის) მოწმობის გაცემა ხორციელდება ამ პირის ან მისი კანონიერი წარმომადგენლის განცხადების საფუძველზე.