დღეს ახალი რეგულაციის დეტალებზე ჟურნალისტებს ეროვნული ბანკის პრეზიდენტი გიორგი ქადაგიძე ესაუბრა.

"1-ლი ივნისიდან ძალაში შედის კომპლექსური დოკუმენტი, რომელიც მაქსიმალურად მოაწესრიგებს ურთიერთობებს კომერციულ ბანკსა და ბანკში მისულ მოქალაქეებს შორის. რაც ყველაზე მნიშვნელოვანია, ამ ინიციატივის განხორციელებით, ხელს შევუწყობთ საბანკო სექტორში კიდევ უფრო მეტად კონკურენციის განვითარებას, რაც საბოლოო ჯამში აუცილებლად აისახება საბანკო პროდუქტის ღირებულებაზე ანუ საპროცენტო განაკვეთებზე", - განაცხადა ბრიფინგზე ეროვნული ბანკის პრეზიდენტმა.
აღნიშნული წესი გავრცელდება ფიზიკური პირებისთვის 1-ლი ივნისიდან დადებულ ყველა სახის სამომხმარებლო სესხის ხელშეკრულებებზე, როდესაც კრედიტის მთლიანი თანხა აღემატება 300 ლარს და ნაკლებია 50 000 ლარზე, ან მის ეკვივალენტზე, ასევე, ფიზიკური პირების ყველა სახის სადეპოზიტო ხელშეკრულებებზე, რომელთა პირველადი შენატანი ნაკლებია 50 000 ლარზე ან მის ეკვივალენტზე.
წესის თანახმად, ბანკები ვალდებულნი იქნებიან ხელშეკრულებებში მიუთითონ ყველა ფინანსური ხარჯი, რომელიც კრედიტითა და დეპოზიტით სარგებლობასთან არის დაკავშირებული, პროდუქტის ეფექტური საპროცენტო განაკვეთი, ინფორმაცია სავალუტო რისკების შესახებ, ხელშეკრულების პირობების ცვლილების წესი და სხვა.

გარდა ამისა, ბანკებმა უნდა შეიმუშაონ პრეტენზიების მიღების სტანდარტული წერილობითი პროცედურა და მიღებული პრეტენზიების სტატისტიკა ყოველთვიურად მიაწოდონ საქართველოს ეროვნულ ბანკს.
ბანკის მხრიდან ხელშეკრულების რომელიმე პუნქტის დარღვევის, ან მომსახურებით უკმაყოფილების შემთხვევაში მომხმარებელს უფლება აქვს ბანკს წარუდგინოს პრეტენზია ზეპირი, წერილობითი ან ელექტრონული ფორმით. პრეტენზიაზე წერილობით პასუხს ბანკისგან წინასწარ განსაზღვრულ დროში მიიღებს. თუ მომხმარებელი მიიჩნევს, რომ მისი უფლებები დაირღვა და მომსახურე ბანკში გასაჩივრების შემდეგ ვერ მიიღო სათანადო პასუხი, მას შეულია საკონსულტაციოდ მიმართოს საქართველოს ეროვნული ბანკის მომხმარებელთა უფლებების დაცვის განყოფილების ვებგვერდის www.nbg.gov.ge/cpან ცხელი ხაზის 406-406 მეშვეობით.
მომხმარებელთა უფლებების დაცვის განყოფილების მთავარი მოვალეობაა, უზრუნველყოს კომერციული ბანკების მხრიდან "მომხმარებელთათვის მომსახურების გაწევისას აუცილებელი ინფორმაციის მიწოდების წესის" შესრულება. გარდა ამისა, აღნიშნული განყოფილების ფუნქციაა უშუალოდ მიიღოს ეს პრეტენზია, განიხილოს და მომხმარებელს აცნობოს შესაბამისი გადაწყვეტილება.