საწარმოებისთვის საწარმოო დანაკარგის განსაზღვრის შესახებ ამიერიდან "საგადასახადო კოდექშიც" ჩაიწერება.
დღემდე ფინანსთა სამინისტრომ, რამდენიმე საწარმოს საწარმოო დანაკარგები განუსაზღვრა, თუმცა როგორც მთავრობის საპარლამენტო მდივანი ამბობს, აღნიშნული ქმედება კანონით გაიწერება.
"შემოდის ახლებური რეგულაციები, რომელიც კოდექსის დონეზე დაარეგულირებს მთელ რიგ საკითხებს, კანონში ნათლად ჩაიწერება, რომ საწარმოო დანაკარგების მოცულობას განსაზღვრას შესაბამისი ორგანო. თუ გარკვეული საწარმოს ტექნიკური დანაკარგის განსაზღვრა მოითხოვს, სხვადასხვა ტიპის ექსპერტიზის ჩატარებას, მაშინ დანაკარგების შესახებ საბოლოო გადაწყვეტილებას მიიღებს მთავრობა. ხოლო, დანარჩენ შემთხვევაში, გადაწყვეტილების მიღების უფლება შემოსავლების სამსახურზე იქნება დელეგირებული"- განაცხადა მთავრობის საპარლამენტო მდივანმა გია ხუროშვილმა.
შეგახსენებთ, რომ შემოსავლების სამსახურის ინიციატივით, საწარმოო დანაკარგები უკვე დადგინდა ბამბის, მეტალურგიის სფეროში ასევე, ალკოჰოლური სასმელის წარმოებისას/იმპორტისას, აგრეთვე სიგარა/სიგარეტისა და სიგარელებისათვის გამოყენებული აქციზური მარკების დაზიანების შემთხვევაში, მინის წარმოებაში. საწარმოო დანაკარგების საკითხი სხვა სფეროებშიც განისაზღვრება და ეს პროცესი ეტაპობრივად განხორციელდება.
შემოსავლების სამსახურის ინფორმაციით, სურვილის შემთხვევაში მეწარმეებს თავად შეუძლიათ მიმართონ შემოსავლების სამსახურს, რომელიც მათ საწარმოო დანაკარგს, გარკვეულ ფასად განსაზღვრავს. დანაკარგების დადგენილი ოდენობა შემდგომში სავალდებულო წესით იქნება გათვალისწინებული გადასახადების ადმინისტრირების, მათ შორის, შემოწმების დროს.
