ყატარული კომპანია "ყატარი დიარი" შესაძლოა საქართველოს უძრავი ქონების სფეროთი დაინტერესდეს. ამის შესახებ ინფორმაციას საქართველოს საგარეო საქმეთა სამინისტრო ავრცელებს.
საქართველოში ვიზიტით მყოფი ყატარული კომპანია "ჰასსად ფუდის" წარმომადგენლები დღეს საქართველოს საგარეო საქმეთა მინისტრმა მიიღო. საგარეო საქმეთა სამინისტროს ინფორმაციით, გრიგოლ ვაშაძე კომპანია "ჰასსად ფუდის" თავმჯდომარეს, ნასერ მოჰამედ ალ ჰაჯრის და კომპანიის სხვა წარმომადგენლებს შეხვდა.
შეხვედრაზე განხილულ იქნა "ჰასსად ფუდის" მიერ საქართველოს სოფლის მეურნეობის სექტორში მსხვილი ინვესტიციების განხორციელების შესაძლებლობები და პერსპექტივები.
საუბარი შეეხო ყატარის საინვესტიციო საზოგადოების კომპანია "ყატარი დიარის" შესაძლო დაინტერესებას საქართველოს უძრავი ქონების სფეროთი და ინვესტიციების დაბანდებას სასტუმროებისა და გამაჯანსაღებელი კომპლექსების მშენებლობაში.
