ეკონომიკის სამინისტრო მსოფლიოს სხვადასხვა ქვეყანაში საქართველოს საინვესტიციო კლიმატის პრეზენტაციას აგრძელებს. 27 მაისს დელიში საინვესტიციო სააგენტოს დირექტორი შეხვდება სასტუმროების სექტორში მომუშავე ბიზნესმენებს და საქართველოში არსებული უძრავი ქონების სექტორში და ტურისტულ ინფრასტრუქტურაში არსებული საინვესტიციო შესაძლებლობების პრეზენტაციას გააკეთებს.
27 მაისს უკრაინის დედაქალაქ კიევში გაიმართება საქართველოს საინვესტიციო კონფერენცია, რომლის ორგანიზატორებიც არიან საქართველოს ეკონომიკისა და მდგრადი განვითარების სამინისტრო, საქართველოს ეროვნული საინვესტიციო სააგენტო, საქართველო-უკრაინის ბიზნესკლუბი, "ბი ჯი კაპიტალი" და "რაკია ჯორჯია ფოთის თავისუფალი ინდუსტრიული ზონა". ღონისძიებას დაეწრებიან უკრაინის წამყვანი კომპანიებისა და სამთავრობო წრეების წარმომადგენლები, რომელთაც სიტყვით მიმართავს საქართველოს ეკონომიკისა და მდგრადი განვითარების მინისტრის პირველი მოადგილე არჩილ კეკელია და გააცნობს ქვეყნის საინვესტიციო კლიმატს.
30-31 მაისს ეკონომიკისა და მდგრადი განვითარების მინისტრი ეწვევა ოსლოს, სადაც შეხვდება ნორვეგიის ტრანსპორტისა და კომუნიკაციის, ასევე ნავთობისა და ენერგეტიკის მინისტრებს. ვიზიტის ფარგლებში დაგეგმილია ოსლოს სავაჭრო-სამრეწველო პალატაში საქართველო-ოსლოს ბიზნესფორუმის ორგანიზება.
საქართველოს დაუმოუკიდებლობის დღესთან დაკავშირებით, საქართველოს ეკონომიკისა და მდგრადი განვითარების სამინისტრომ ეროვნული საინვესტიციო სააგენტოსთან ერთად დაიწყო ქვეყნის საინვესტიციო კლიმატის პრეზენტაცია მსოფლიოს სხვადასხვა ქვეყანაში.
ავსტრიის დედაქალაქმა უმასპინძლა ერთ-ერთ ყველაზე პრესტიჟულ და ცნობილ უძრავი ქონების გამოფენას "რიალ ვენა 2011". საქართველოს ეროვნული საინვესტიციო სააგენტო მონაწილეობდა უძრავი ქონების გამოფენაში და წარმოადგენდა მიმდინარე საინვესტიციო პროექტებს აღნიშნულ სფეროში. მონაწილე ქვეყნებს შორის იყვნენ ავსტრია, ნიდერლანდები, გერმანია, შვეიცარია, პოლონეთი, აშშ, რუმინეთი, ჩეხეთი, ბულგარეთი და სხვა ქვეყნები.
გაიმართა ეკონომიკისა და მდგრადი განვითარების მინისტრის ვერა ქობალიას ვიზიტი გერმანიაში, რომლის ფარგლებშიც მინისტრი მონაწილეობდა ტრანსპორტის კონფერენციაში ლაიპციგში და შეხვდა გერმანიის ტრანსპორტისა და ტექნოლოგიების მინისტრის მოადგილეს, ასევე ბუნდესტაგის ეკონომიკისა და ტექნოლოგიების კომიტეტის თავმჯდომარეს. ქობალიამ შეხვედრები გამართა ქ. ბერლინში გერმანული ბიზნესწრეების წარმომადგენლებთან და საქართველოში არსებული საინვესტიციო გარემოს პრეზენტაცია გააკეთა.
26 მაისს, საქართველოს დამოუკიდებლობის დღესთან დაკავშირებით, საქართველოს საინვესტიციო სააგენტომ და საქართველოს საელჩომ ინდოეთში მოაწყო ქართული ღვინის დღე. საინვესტიციო სააგენტოს ექსპორტის ხელშეწყობის სამსახურის ორგანიზებით ღონისძიებაში მონაწილეობა მიიღეს ქართული ღვინის სამი კომპანიის: "თბილღვინოს", "ბაგრატიონის" და "ვაინმენის" წარმომადგენლებმა და მოეწყო ქართული ღვინის დეგუსტაცია. ინდოელ სტუმრებს უმასპინძლა ქართული ფოლკლორულმა ანსამბლმა "ჩვენებურები", წარმოდგენილი იყო ქართველი მზარეულის მიერ მომზადებული ტრადიციული კერძები. საზეიმო მიღების მთავარ მიზანს ქართული კულტურის, სამზარეულოს და ქართული პროდუქციის პოპულარიზაცია წარმოადგენდა. მიღებაზე მიწვეულნი იყვნენ ინდოეთის მთავრობის წევრები, ბიზნესმენები, რომლებიც უკვე მუშაობენ საქართველოსთან და ის ბიზნესმენები, რომლებიც დაინტერესებულნი არიან თანამშრომლობით.
