ავსტრიის დედაქალაქ ვენაში უძრავი ქონების საერთაშორისო გამოფენაში გაიხსნა, სადაც 50 ქვეყანას შორის ქართული დელეგაციაც მონაწილეობს.
ეკონომიკისა და მდგრადი განვითარების სამინისტროს ინფორმაციით, გამოფენას 4000-ზე მეტი დამთვალიერებელი სტუმრობს. საქართველოს პავილიონში დაინტერესებულ პირებს ინფორმაციას რამდენიმე მსხვილი საინვესტიციო პროექტის შესახებ აწვდიან. მათ შორისაა ანაკლიასა და ქობულეთის თავისუფალი ტურისტული ზონა, თბილისი და ბათუმი, როგორც ხელსაყრელი ადგილები ახალი სასტუმროების ასაშენებლად, აგრეთვე წყალტუბოსა და მესტიის განვითარების პროექტები. საქართველოს პავილიონის მასპინძელია ეკონომიკის სამინისტროსთან არსებული ეროვნული საინვესტიციო სააგენტო.
ვენის უძრავი ქონების გამოფენა ერთ-ერთი ყველაზე პრესტიჟულია ცენტრალურ და აღმოსავლეთ ევროპაში და როგორც წესი, მასში მონაწილეობენ უმსხვილესი ინვესტორები, რომელთაც სურვილი აქვთ, საკუთარი კაპიტალი უძრავ ქონებაში დააბანდონ. წელს გამოფენას ესწრებიან მსოფლიოს უმსხვილესი უძრავი ქონების სააგენტოების ხელმძღვანელები, არქიტექტორები, დეველოპერები, სახელმწიფო და კერძო სექტორის წარმომადგენლები.
გამოფენამდე რამდენიმე დღით ადრე საერთაშორისო სარეიტინგო კომპანია „ესტეერ გლობალმა" კვლევა გამოაქვეყნა, რომლის თანახმად, თბილისის სასტუმროების 100 პროცენტი წინასწარ არის დაჯავშნული. გამოკითხვაში მონაწილეობას თბილისის 5 ყველაზე მსხვილი სასტუმროს - „თბილისი მარიოტის", „ქორთიარდ მარიოტის", „რედისონის", „შერატონისა" და „ჰოლიდეი ინის" წარმომადგენლები იღებდნენ. ისინი დარწმუნებულნი არიან, რომ ტენდენცია გაგრძელდება, რადგან უცხოეთიდან შემოსულ ვიზიტორთა რაოდენობა ყოველწლიურად საშუალოდ 35-37 პროცენტით იზრდება.
დღესდღეობით თბილისში 52 სასტუმრო და დაახლოებოთ 2400 საწოლი ადგილია. საქართველოს დელეგაციის მთავარი არგუმენტი ვენაში ჩასული ინვესტორებისათვის ის არის, რომ საქართველოში სასტუმროების აშენება სწრაფად მოიტანს შემოსავალს და რომ ეს ყველაზე მზარდი ბიზნესია ქვეყანაში. გამოფენა 24 მაისს გაიხსნა და ორ დღეს გასტანს.