გასულ კვირას "ვისოლმა" ავტოგასამართი სადგურების ქსელს სამი ობიექტი შემატა და 100-მდე ადამიანი დაასაქმა. თბილისში, ნუცუბიძისა და გამრეკელის ქუჩების კვეთაზე, ზუგდიდში, რუსთაველის ქუჩა #328-ში და ბათუმში, პუშკინის ქუჩა #77-ში მდებარე ავტოგასამართ სადგურებზე "ვისოლი" მომხმარებელს ნავთობპროდუქტების ფართო არჩევანს სთავაზობს. სხვა პროდუქტებთან ერთად ახალ ავტოგასამართ სადგურზე ევრო ხუთის სტანდარტის იტალიური აპიც გაიყიდება. ზუგდიდის ავტოგასამართ სადგურზე მომხმარებელს ასევე საშუალება ექნება „ავტო ექსპრესის" ცენტრში ფრანგული ტოტალის ზეთები და ავტომობილის რეცხვის მომსახურება მიიღოს.
"ვისოლის" მენეჯმენტის ინფორმაციით, ახალი ავტოგასამართი სადგურების მშენებლობისათვის კომპანიამ მილიონ ლარზე მეტი ინვესტიცია განახორციელა და პროდუქტისა თუ მომსახურების ხარისხისა და უსაფრთხოების ნორმები, ტრადიციულად, ევროპულ სტანდარტებს შეუსაბამა. მაღალტექნოლოგიური ამერიკული საწვავის მიწოდების სისტემა, რომელიც ვისოლის ყველა ავტოგასამართ სადგურზეა დამონტაჟებული, 100% სიზუსტით ახდენს მომხმარებლისათვის საწვავის მიწოდებას.
ახლადგახსნილ ავტოგასამართ სადგურებზე დასაქმებულ პირებს შესაბამისი ტრენინგი ჩაუტარდათ. ვისოლის ავტოგასამართ სადგურზე დასაქმებული ყველა თანამშრომელი დაზღვეულია და უფასო კვებით სარგებლობს.
ვისოლს საკუთრებაში არსებული ავტოგასამართი სადგურების ყველაზე ფართო ქსელი აქვს საქართველოში. წლის ბოლომდე ვისოლის ქსელს კიდევ რამდენიმე ავტოგასამართი სადგური დაემატება.
