შემოსავლების სამსახური მეწარმეთა კონტროლში საზოგადოების ჩართვის ინიციატივით გამოდის. მოქმედებას იწყებს კერძო საგადასახადო ინსპექტორის საპილოტე პროგრამა.
შემოსავლების სამსახურის ინფორმაციით, საგადასახადო ინსპექტორებს მეწარმის შემოწმება და დარღვევების გამოვლენა დაევალებათ: საკონტროლო - სალარო აპარატის გამოუყენებლობა, სალარო ჩეკის არ ამორტყმა; და ასევე საკონტროლო - აპარატის გამოყენების დროს, განგებ, მცირე რაოდენობის თანხის მითითება;
კერძო საგადასახადო ინსპექტორები კონკურსის წესით შეირჩევიან.
ისინი შემოსავლების სამსახურისგან დამოუკიდებელად იმოქმედებენ და თვითდაფინანსებით იმუშავებენ.
აქამდე მეწარმის შემოწმების უფლება მხოლოდ შემოსავლების სამსახურის საგადასახადო პრევენციის დეპარტამენტს ჰქონდა. საზოგადოებრივი კონტროლის მექანიზმის ამოქმედების შემდეგ, ამ ფუნქციას კერძო საგადასახადო ინსპექტორები შეასრულებენ.
კერძო საგადასახადო ინსპექტორის ინსტიტუტის შემოღება ხელს შეუწყობს, ერთის მხრივ, მეწარმის გაკონტროლებას და, მეორე მხრივ, დასაქმების პრობლემის მოგვარებას. საწყის ეტაპზე საპილოტე პროგრამაში 20 ადამიანი ჩაერთვება, საბოლოო ჯამში კი 200- დან 300 პირამდე დასაქმდება.
შესაბამისად იცვლება საგადასახადო პრევენციის დეპარტამენტის ოფიცრების ფუნქციები, კონტროლის ნაწილში მათ საგადასახადო ინსპექტორები ჩაენაცვლებიან. შემოსავლების სამსახურის თანამშრომლების ძირითადი მოვალეობა დარღვევების პრევენცია, მეწარმის გაფრთხილება და საგანმანათლებლო სამუშაოები ხდება.