საქართველოსა და ჩინეთის სახალხო რესპუბლიკას შორის პირდაპირი საჰაერო მიმოსვლა იწყება. ეს საკითხი სამინისტროში გამართულ შეხვედრაზე განიხილეს. ჩინეთის ავიაკომპანიის "China southern airlines" -ის დელეგაციას საქართველოს ეკონომიკისა და მდგრადი განვითარების მინისტრის მოადგილე გიორგი კარბელაშვილი და სამოქალაქო ავიაციის სააგენტოს ხელმძღვანელი ირაკლი დავითაძე შეხვდნენ.
ჩინეთის სახალხო რესპუბლიკასა და საქართველოს შორის პირველი ავიარეისი 2011 წლის 9 ივნისს შესრულდება. ფრენები განხორცილდება ჩინეთის ავიაკომპანიის "China southern airlines" -ის მიერ. ავიაკომპანია სიდიდით მსოფლიოში მეოთხე ადგილს იკავებს. რეისი ურუმჩი-თბილისი-ურუმჩის მიმართულებით კვირაში სამჯერ - ყოველ სამშაბათს, ხუთშაბათს და შაბათს შესრულდება. ფრენის ხანგრძლივობა დაახლოებით 5 საათი იქნება.
ჩინეთთან საჰაერო მიმოსვლის დაწყების შესახებ კომენტარი გააკეთა საქართველოს ეკონომიკისა და მდგრადი განვითარების მინისტრმა ვერა ქობალიამ. მინისტრის განცხადებით, პირდაპირი რეგულარული ავიარეისის დანიშვნა ხელს შეუწყობს ორი ქვეყნის საქმიანი წრეების სამომავლო თანამშრომლობას და საქართველოში ახალი ინვესტიციების მოზიდვას. ქობალიას განცხადებით, საქართველო-ჩინეთს შორის პირდაპირი ავიარეისები უფრო ინტენსიურს გახდის ორ ქვეყანას შორის ტურისტულ ურთიერთობებს.
როგორც კარბელაშვილმა აღნიშნა, ეს ერთ-ერთი მნიშვნელოვანი რეისი იქნება საქართველოს ისტორიაში, რადგან ქვეყანა კიდევ ერთხელ შეასრულებს სატრანზიტო ფუნქციას.
მიღწეული შეთანხმების მნიშვნელობაზე ისაუბრა ჩინეთის დელეგაციის ხელმძღვანელმაც. ჩინეთის სამხრეთის ავიახაზების ხინძიანის ფილიალის ვიცეპრეზიდენტის, კან იუნგ ჯანის განცხადებით, ორ ქვეყანას შორის პირდაპირი ავიამიმოსვლის დაწყება მნიშვნელოვანია როგორც პოლიტიკურ-ეკონომიკური, ისე ტურისტული სფეროების მხარდაჭერის კუთხით.
