კომპანია "დექსუსმა" კიდევ ერთი შეჩერებული პროექტის მშენებლობა განაახლა. წყნეთში მდებარე საცხოვრებელი კომპლექსის სამუშაოების განახლებას თბილისის მერი გიგი უგულავა, კომპანიის დამფუძნებლები და ის მომხმარებლები დაესწრებიან, რომლებიც კომპლექსში კუთვნილი ფართების მიღებას წლების განმავლობაში ელოდებიან.
„დექსუსი" აღნიშნული ობიექტის მშენებლობაში მილიონ ნახევარი ლარის ინვესტიციას განახორციელებს. საცხოვრებელი კორპუსის მშენებლობა მიმდინარე წლის პირველ ოქტომბერს დამთავრდება. პროექტის დასრულების შემდეგ კუთვნილ ფართს 30 მომხმარებელი მიიღებს.
წყნეთის საცხოვრებელი კორპუსის მშენებლობა კომპანია „ცენტრ პოინტმა" 2008 წელს დაიწყო, თუმცა ფინანსური პრობლემების გამო სამუშაოები შეჩერდა.
"დექსუსმა" სამშენებლო ბაზრის ერთ-ერთი ყველაზე დიდი სამშენებლო კომპანიის, „ცენტრ პოინტის" ჯგუფის 100%-ანი წილი მართვაში 2010 წლის სექტემბერში აიღო. შემუშავდა „ცენტრ პოინტის" რეაბილიტაციის გეგმა, რომლის თანახმად 2012 წლის აპრილამდე მომხმარებლების 51,5% დაკმაყოფილდება.
„დექსუსმა" 4 პროექტის მშენებლობა უკვე დაასრულა. ამჟამად კომპანია სამშენებლო სამუშაოებს 5 ობიექტზე აწარმოებს. ყველა მიმდინარე პროექტებზე სამუშაოები 2011 წელის განმავლობაში დასრულდება.