რძის პროდუქტების ბაზარზე ახალი ბრენდი „ფაქიზო" ბათუმსა და ქუთაისში იყიდება. როგორც სააგენტო "კი-ეიჩ-ენს" „კაუკაზუს აგროდეველოფმენთში" განუცხადეს, მისმა შვილობილმა კომპანია „უნიფარმმა" მაღაზიათა ქსელ "პოპულიში" "ფაქიზოს" ბრენდის რძის პროდუქტების რეალიზაცია დაიწყო. საწყის ეტაპზე "ფაქიზოს" რძის პროდუქტები - მაწონი, ხაჭო და არაჟანი, პოპულის ქუთაისისა და ბათუმის მაღაზიებში გაიყიდება. შემდეგი წლიდან კი იგეგმება ფაქიზოს პროდუქციის განთავსება პოპულის თბილისის მაღაზიათა ქსელშიც.
კომპანიის ინფორმაციით, საწყის ეტაპისათვის "ფაქიზოს" პროდუქციის რეალიზაცია დასავლეთ საქართველოში ხორციელდება. მომავალი წლიდან, კომპანია წარმოების გაზრდას და თბილისში ბაზრის მნიშვნელოვანი წილის დაკავებას გეგმავს. იმავდროულად „უნიფარმი" აპირებს ასორტიმენტის გაფართოებას და სხვადასხვა რძის ნაწარმის, მათ შორის სხვადასხვა სახეობის ყველის დამატებას.
აღსანიშნავია, რომ სს „უნიფარმი" არის რძის პროდუქტების ერთადერთი
მწარმოებელი საქართველოში საკუთარი რძის მეურნეობით "მოხარულნი ვართ, რომ დავიწყეთ ფაქიზოს ბრენდით რძის პროდუქტების გამოშვება. ფაქიზოს რძის ნაწარმის გადამუშავება ხდება უმკაცრეს სანიტარულ პირობებში, სადაც ყველა პროცესი და დანადგარი გათვლილია იმისათვის, რომ ვაწარმოოთ მაღალი ხარისხის რძე და რძის პროდუქტები", განაცხადა რატი მექვაბიშვილმა, კად-ის გენერალურმა დირექტორმა.
სს „უნიფარმი" ერთ-ერთი ყველაზე თანამედროვე სარძევე ფერმაა საქართველოში, რომელსაც აქვს წარმოების მთლიანი ჯაჭვი - წარმოება, გადამუშავება და დისტრიბუცია.სს "კაუკაზუს აგროდეველოფმენთის" ინფორმაციით, პროექტის სრული ღირებულება 3 მლნ. ლარია. კომპანიაში აცხადებენ, რომ სადგომი აშენებულია ევროპული სტანდარტების მიხედვით და ყველა იმ დეტალს ითვალისწინებს, რომელსაც გავლენა აქვს ძროხის კეთილდღეობაზე. ჰოლანდიური კომპანიის DSD Stalinrichting -ის ინჟინრებმა სადგომში მაღალი ხარისხის შიდა მოწყობილობები და თანამედროვე ნაკელ-გამტანი და სავენტილაციო სისტემები უკვე დაამონტაჟეს.
"კაუკაზუს აგროდეველოფმენთი" (კად) წარმოადგენს სააქციო საზოგადოებას რომელიც 2008 წლის გაზაფხულზე დაფუძნდა და მის ძირითად საქმიანობას წარმოადგენს ინვესტიციების განხორცილება სოფლის მეურნეობის სექტორში ამიერკავკასიის რეგიონში. კად-ის საინვესტიციო საქმიანობის ძირითად დარგობრივ მიმართულებებს წარმოადგენენ: რძის პროდუქტების წარმოება, მეცხოველეობა, მეფრინველეობა, მეთევზეობა, სასათბურე მეურნეობა და სასაწყობო ინფრასტრუქტურის მშენებლობა
