"ეროვნულ-დემოკრატიული" პარტიის წევრი, დეპუტატი გურამ ჩახვაძე სასჯელაღსრულების, პრობაციისა და იურიდიულ საკითხთა მინისტრის პასუხისმგებლობის საკითხის დაყენებას ისევ მოითხოვს და აცხადებს, რომ ხათუნა კალმახელიძის აღნიშნულ თანამდებობაზე დარჩენა ამერიკის შეერთებულ შტატებთან ურთიერთობაზე უარყოფითად შეიძლება აისახოს.
"უკვე გამოიკვეთა, რომ სასჯელაღსრულების სისტემაში პატიმრების უფლებების დარღვევა და ღირსების შემლახავი მოქცევა სისტემად ჩამოყალიბდა", - აღნიშნა ჩახვაძემ დღეს გამართულ პრესკონფერენციაზე, რომელზეც აშშ-ის სახელმწიფო დეპარტამენტის მიერ გამოქვეყნებული ანგარიში შეაფასა.
მისივე თქმით, შეერთებული შტატების კრიტიკურ ანგარიშს საქართველოს ხელისუფლების მხრიდან ადეკვატური ნაბიჯები უნდა მოჰყვეს.
"აუცილებელია საკადრო ცვლილებების განხორციელება, რადგან კალმახელიძე სისტემის მართვას თავს ვერ ართმევს. ასევე უნდა დაისაჯონ ის პირებიც, რომლებიც პენიტენციალურ სისტემაში დანაშაულს უშუალოდ ჩადიან და არღვევენ პატიმრების უფლებებს", - განმარტა დეპუტატმა და აქვე დასძინა, რომ "თუ ხელისუფლების მხრიდან აღნიშნულ ანგარიშს ადეკვატური რეაგირება არ მოჰყვება, ამან შესაძლოა როგორც საერთაშორისო ორგანიზაციებთან, ისე თავად შეერთებულ შტატებთან ურთიერთობების გაფუჭება გამოიწვიოს".
შეგახსენებთ, რომ აშშ-ის სახელმწიფო დეპარტამენტმა მსოფლიოს სხვადასხვა ქვეყანაში ადამიანის უფლებათა მდგომარეობის შესახებ ყოველწლიური ანგარიში გამოაქვეყნა. საქართველოსთან დაკავშირებით მასში ნათქვამია, რომ გასულ წელს ქვეყანაში ადამიანის ძირითადი უფლებები ირღვეოდა, მათ შორის, პატიმრებისა და იძულებით ადგილნაცვალ პირთა შემთხვევებში. გარდა ამისა, დოკუმენტში ყურადღება გამახვილებულია მედიის მდგომარეობაზეც და აღნიშნულია, რომ მასზე ზეწოლა ხორციელდება.