14-16 აპრილს საქართველო კავკასიის საერთაშორისო ტურისტულ გამოფენასა და "სუამის" ქვეყნების მინისტერიალს მასპინძლობს. როგორც დღეს, ტურიზმის ეროვნულ სააგენტოში გამართულ ბრიფინგზე, სააგენტოს ხელმძღვანელის მოადგილემ ბექა ჯაყელმა განაცხადა, "EXPO 2011"-ს 14 აპრილს 11:00 საათზე ეკონომიკისა და მდგრადი განვითარების მინისტრი ვერა ქობალია და ტურიზმის ეროვნული სააგენტოს თავმჯდომარე მაია სიდამონიძე გახსნიან. EXPO 2011-ზე წარმოდგენილი იქნებიან 5 ქვეყნიდან (თურქეთი, პოლონეთი, აზერბაიჯანი, ბელორუსია, უკრაინა), ქართული შემომყვანი ტუროპერატორები, სასტუმროები, პეგასუსისა და ყაზახეთის ავიახაზები, სხვადასხვა სახის მომსახურიბის კერძო კომპანიები და ასევე საკუთარი სტენდებით წარმოდგენილი იქნებიან მცხეთა-მთიანეთის, შიდა ქართლის, კახეთის, რაჭა-ლეჩხუმისა და სამცხე-ჯავახეთის რეგიონებიდან.
"წლავანდელი გამოფენა იქნება საკმაოდ მასშტაბური და შინაარსობრივად ძალიან საინტერესო, სადაც მთავარი აქცენტი შიდა ტურიზმზე გაკეთდება. მნიშვნელოვანია, რომ საქართველოს მოქალაქეებმა წინასწარ დაგეგმონ საკუთარი დასვენება და ამის შესახებ კი დეტალურ ინფორმაციასა და პრეზენტაციებს ამ გამოფენაზე გაეცნობიან.
მნიშვნელოვანია, რომ წელს EXPO 2011-ზე წარმოდგენილი იქნება უნიკალური ქართული სუვენირები. ვიზიტორებს შეეძლებათ გაეცნონ და ადგილზე შეიძინონ ქართული სუვენირები"- განაცხადა ტურიზმის ეროვნული სააგენტოს ტავმჯდომარის მოადგილემ ბექა ჯაყელმა.
EXPO 2011-მასპინძელი, EXPO GEORGIA-ს მენეჯერის ნინო გამრეკელის თქმით, წელს გამოფენას საკმაოდ დიდი მასშტაბი აქვს და მასში გაცილებით მეტი კომპანია მონაწილეობს, ვიდრე გასულ წლებში.
"ესეთი გამოფენა მე-13 წელია ტარდება და მას საკმაოდ დიდი მასშტაბი აქვს. წელს გამოფენაში მონაწილე სუბიექტების რაოდენობა 50 %-ით გაიზარდა. წლევანდელი გამოფენის ორგანიზებას განსხვავებული კონცეფციითაც მივუდეგით. წელს აქცენტი გაკეთდა შიდა ტურიზმზე. კომპანიებთან წინასწარ შედგა მოლაპარაკებები და შეხვედრები და ჩვენ მათ ვთხოვეთ, რომ მაქსიმალურად ინტერაქტიულები ყოფილიყვნენ გამოფენაზე. გამოფენის ფარგლებში მნახველებს შეეძლება მიიღონ ინფორმაცია მთელი ტურისტული სპექტრის შესახებ. ყველა ტურისტული ობიექტი, რომელიც მზადაა ტურისტის მიღებად გამოფენაზე იქნება წარმოდგენილი" აღნიშნა ნინო გამრეკელმა.
ტურიზმის ეროვნული სააგენტოს თავმჯდომარის მოადგილის, ბექა ჯაყელის თქმით, EXPO 2011-ის ფარგლებში დაგეგმილია სხვადასხვა აქტივობა, მათ შორის ტურიზმის ეროვნული სააგენტოს პრეზენტაცია, ინფო-ტურის მონაწილეთა და ქართველ ტუროპერატორთა B2B შეხვედრები, სასწავლო სესიები სტუდენტებისათვის, ფოტოგამოფენა, ქართული სუვენირების გამოფენა-გაყიდვა.
იმავდროულად, კავკასიის საერთაშორისო ტურისტული გამოფენის ფარგლებში ეკონომიკისა და მდგრადი განვითარების მინისტრი ვერა ქობალია მასპინძლობს "სუამის" ქვეყნების მინისტერიალს, სადაც სუამის წევრი ქვეყნების გარდა მონაწილეობას თურქეთისა და ბელორუსიის ტურიზმის მინისტრები მიიღებენ. სტუმრები დაესწრებიან გამოფენის გახსნას, დაათვალიერებენ სტენდებს რის შემდეგაც, 14:30 საათზე, სასტუმრო "მარიოტში" გაიმართება მინისტერიალის შეხვედრა რომელსაც ეკონომიკის მინისტრთან ერთად ტურიზმის ეროვნული სააგენტოს თავმჯდომარე დაესწრება და განხილული იქნება სამომავლო თანამშრომლობის პერსპექტივები.
აღნიშნული გამოფენა წელს ვიზიტორებს გასართობ აქტივობებსაც სთავაზობს. დაგეგმილია ღამის შოუს ბენდის კონცერტი, თითების თეატრის წარმოდგენები, სტუმრებს შესაძლებლობა ექნებათ დააგემოვნონ ქართული ღვინო და ყველი, დაგეგმონ თავიანთი მოგზაურობა საქართველოს საუკეთესო ტურისტულ ადგილებზე, გაიგონ რა სახის ტურისტულ მარშრუტებს სთავაზობენ ტურისტული სააგენტოები მსოფლიოს სხვადასხვა მიმართულებით, გაეცნონ და შეიძინონ ქართული უნიკალური ხელნაკეთი სუვენირები, გაერთონ და ისიამოვნონ ქართული მუსიკითა და გასართობი შოუებით. ასევე გათამაშებით მოიგონ 2-კაციანი საგზური საქართველოს კურორტებზე.