ნატო-რუსეთის საბჭოს სხდომის დაწყებამდე ალიანსის გენერალურმა მდივანმა საქართველოს მხარდამჭერი კიდევ ერთი განცხადება გააკეთა. ანდრეს ფოგ რასმუსენმა აღნიშნა, რომ ალიანსი კვლავ მოითხოვს საქართველოს ტერიტორიული მთლიანობისა და სუვერენიტეტის პატივისცემას. სადაო საკითხებზე კი ნატოს გენმდივანი დღეს რუსეთის საგარეო საქმეთა მინისტრთან შეხვედრაზეც ისაუბრებს. სერგეი ლავროვი ნატო-რუსეთის საბჭოს სხდომაზე რუსეთის დელეგაციას უხელმძღვანელებს. ცნობილია რომ ერთ ერთი მნიშვნელოვანი საკითხი იქნება მზადება ანდრეს ფოგ რასმუსენის პირველი ვიზიტისათვის მოსკოვში. ნატოს გენერალური მდივანი რუსეთში 15 დეკემბერს ჩადის. ნატო-რუსეთის საბჭოს სხდომა რუსეთY-საქართველოს ომის შემდეგ დღეს პირველად ტარდება.
"ნატო-საქართველოს კომისიის სხდომაზე ჩვენ კიდევ ერთხელ დავადასტურეთ, რომ ბუქარესტის სამიტზე მიღებული გადაწყვეტილება კვლავ ძალაშია. საჭირო კრიტერიუმების შესრულების შემთხვევაში საქართველო ალიანსის წევრი გახდება. შეხვედრაზე ჩვენ კიდევ ერთხელ მოვითხოვეთ საქართველოს ტერიტორიული მთლიანობისა და სუვერენიტეტის პატივისცემა. მივესალმებით რეფორმების კუთხით საქართველოში მიღწეულ პროგრესს. რაც შეეხება დღევანდელი ნატო-რუსეთის საბჭოს შეხვედრას მე ველი რამდენიმე მნიშვნელოვან დოკუმენტზე შეთანხმებას, რომლებიც ნატო-რუსეთის ურთიერთობებში ახალი ეტაპის დასაწყისი გახდება",_ განაცხადა ალიანსის გენერალურმა მდივანმა ანდრეს ფოგ რასმუსენმა.
