პარლამენტის თავმჯდომარემ, დავით ბაქრაძემ, კომიტეტებს "ელექტროენერგიისა და გაზის შესახებ" კანონში დეპუტატ ჯონდი ბაღათურიას მიერ მომზადებული ცვლილების განხილვა დაავალა.
როგორც ბიუროს სხდომაზე ბაღათურიამ აღნიშნა, კომიტეტების მხრიდან მის კანონპროექტს განხილვის ვადა ისე გავიდა, რომ მასზე არ უმსჯელიათ, შესაბამისად, დეპუტატმა რეგლამენტის თანახმად საკითხის პირდაპირ პლენარულ სხდომაზე გატანა მოითხოვა, რასაც მხარი ვიცე-სპიკერმა ლევან ვეფხვაძემაც დაუჭირა.
აღნიშნულთან დაკავშირებით, პარლამენტის თავმჯდომარემ კომიტეტებს კანონპროექტის განსახილველად კიდევ ორი კვირა მისცა და ბაღათურიას დაჰპირდა, რომ მისი არგანხილვის შემთხვევაში, რეგლამენტის შესაბამისად იმოქმედებს.
შეგახსენებთ, რომ "ქართული დასის" ლიდერი გადასახადების ერთიან სისტემას აპროტესტებს და აცხადებს, რომ არ შეიძლება ადამიანს ელექტროენერგია მხოლოდ იმიტომ ჩაუჭრა, რომ მას დასუფთავების გადასახადი არ აქვს გადახდილი.