სურსათის ეროვნული სააგენტო სურსათის მწარმოებელი საწარმოების სახელმწიფო კონტროლს აგრძელებს. სააგენტოს ინფორმაციით, ამჯერად ინსპექტირება რძის მწარმოებელ კომპანიებში - "ვიმბილდანსა" და "ნატურალ პლუსში" ხორციელდება.
"სურსათის უვნებლობისა და ხარისხის შესახებ" საქართველოს კანონის თანახმად, 2011 წლის 3 იანვრიდან ძალაში შევიდა ყველა ტიპის სურსათის/ცხოველის საკვების მწარმოებელ საწარმოთა სახელმწიფო კონტროლი. ინსპექტირება უკვე განხორციელდა 20 ხორცისა და რძის გადამამუშავებელ საწარმოში, სასაკლაოსა და მეფრინველეობის ფაბრიკებში. გაიცა შესაბამისი რეკომენდაციები, თუმცა. არც ერთ საწარმოში კრიტიკულ შეუსაბამობას ადგილი არ ქონია. უახლოეს პერიოდში ინსპექტირებას დაექვემდებარება მარკეტები და საზოგადოებრივი კვების ობიექტები, მათ შორის რესტორნები. მიმდინარე წელს დაგეგმილია სააგენტოს უფლებამოსილი მოხელეების მიერ 200-მდე მაღალი რისკის საწარმოს ინსპექტირება.
"თუ ბიზნესოპერატორს აქვს შეუსაბამობა კანონმდებლობასთან მიმართებაში, ინსპექტორის მოვალეობაა, მიუთითოს ამ შეუსაბამობის შესახებ და ბიზნესოპერატორმა შესაბამის ვადაში მოახდინოს მისი აღმოფხვრა. როგორც სააგენტოსთვის, ისე ბიზნესოპერატორისთვის მნიშვნელოვანია, რომ ბაზარზე განთავსდეს უვნებელი სურსათი და ეს ამოცანა მიღწეულ იქნება მხოლოდ ურთიერთთანამშრომლობის გზით"- აცხადებს სააგენტოს ხელმძღვანელი, დავით კობერიძე.