"თავისუფალი დემოკრატების" ლიდერმა ირაკლი ალასანიამ დღეს გამართულ პრესკონფერენციაზე შსს-ს სისტემის ფარგლებში საზოგადოებრივი საბჭოს შექმნის ინიციატივის შესახებ განაცხადა. იდეის განხორციელების მიზნით მან საზოგადოებრივ ორგანიზაციებს ამ საკითხზე მსჯელობის დაწყება შესთავაზა.
ალასანიას თქმით, საბჭოს შექმნის მიზანია პოლიციის საქმიანობაზე საზოგადოებრივი კონტროლის დაწესება და ამავე საქმიანობის სტრატეგიული მიმართულებების განსაზღვრაში საზოგადოების თანამონაწილეობის უზრუნველყოფა.
"კონტროლის ეს დამოუკიდებელი ფორმა კარგი საშუალებაა პოლიციის მუშაობის ეფექტური ზედამხეველობისა და მისი გამჭვირვალობისთვის. პოლიციის მხრიდან სამართალდარღვევის გამოვლენისა და ამ ფაქტებზე სწრაფი რეაგირებისთვის, რაც ახალ საარჩევნო გარემოში პოლიციის დეპოლიტიზაციას გულისხმობს. პოლიცია პოლიტიკური დიქტატისგან უნდა გათავისუფლდეს," - აღნიშნა ალასანიამ.
მისი თქმით, საზოგადოებრივი საბჭოს წევრები სახალხო დამცველმა უნდა წარადგინოს. ამდენად, "თავისუფალი დემოკრატები" ამ წინადადებით სახალხო დამცველს უახლოეს ხანში მიმართავენ.
როგორც ირაკლი ალასანიას თანაგუნდელმა ლევან იზორიამ განაცხადა, სავარაუდოდ, შსს უნდა დაინტერესდეს ამ პროექტით.
იზორიას თქმით, შსს-ს სისტემის ფარგლებში პოლიციის საზოგადოებრივი კონტროლის მექანიზმს კარგად იცნობს ევროპული სახელმწიფოების პრაქტიკა. საქართველოში მისი შექმნის აუცილებლობაზე აქცენტს ამახვილებდა ევროკომისიის მისიის მიერ "კანონის უზენაესობის" პროექტის ფარგლებში 2005 წელს მომზადებული პოლიციის რეფორმის სტრატეგია.
ლევან იზორიას თქმით, პოლიციის თვითნებობას ხელს უწყობს 2010 წლის სექტემბერში განხორციელებული ცვლილებები, რომლის თანახმადაც პოლიციელს ყოველგვარი კონკრეტული საფუძვლის გარეშე, მხოლოდ ე.წ. "გონივრული ეჭვის" საფუძველზე, პიროვნების შეჩერებისა და მის ტანსაცმელზე ზედაპირული შემოწმების განხორციელების უფლება ეძლევა.
"თავისუფალი დემოკრატები" მიიჩნევენ, რომ პოლიციის საზოგადოებრივი კონტროლის აუცილებლობა ქვეყანაში შექმნილი რეალობითაა განპირობებული. კერძოდ, პოლიციელთა მხრიდან თვითნებური მოქმედებებისა და უფლებამოსილების გადამეტების ფაქტებმა იმატა.
