"დემოკრატიული მოძრაობა" ტელერადიო კომპანია "თრიალეთის" მაუწყებლობის შეჩერებას ტელეკომპანიის ეთერში ნინო ბურჯანაძის გუშინდელ გამოსვლას უკავშირებს და "თრიალეთის" მაუწყებლობის სასწრაფოდ აღდგენას მოითხოვს.
"დემოკრატიული მოძრაობა" კატეგორიულად ვგმობთ დღეს ტელერადიოკომპანია "თრიალეთისთვის" ტელეცენტრის მიერ მაუწყებლობის შეწყვეტის ფაქტს და სრულად ვიზიარებთ ტელერადიომაუწყებლის დამფუძნებლის, ბადრი ნანეტაშვილის განცხადების შინაარს. "თრიალეთისთვის" მაუწყებლობის შეწყვეტა პირდაპირ კავშირშია პირველ მარტს ტელეკომპანიის ეთერში "დემოკრატიული მოძრაობის" ლიდერის, ნინო ბურჯანაძის გამოსვლასთან და ამ ფაქტს ხელისუფლების მხრიდან თავისუფალი სიტყვის ჩახშობის კიდევ ერთ ვანდალურ მცდელობად ვაფასებთ", - აღნიშნულია "დემოკრატიული მოძრაობის" მიერ გავრცელებულ განცხადებაში.
განცხადების მიხედვით, გუშინდელმა პირდაპირმა ეთერმა და მისი მსვლელობის დროს შემოსულმა ზარებმა ნათლად დაადასტურა, რა დიდი მნიშვნელობა აქვს თავისუფალი მედიის არსებობას ქვეყანაში.
"სწორედ ამიტომ შეშინებული ხელისუფლება ყველა ხერს იყენებს, რათა მოსახლეობას არ მიეცეს შესაძლებლობა, გაიგოს სიმართლე. კატეგორიულად მოვითხოვთ, ტელერადიოკომპანია "თრიალეთის" მაუწყებლობა სასწრაფოდ იქნას აღდგენილი. მივმართავთ საქართველოში აკრედიტებული დიპლომატიური კორპუსისა და არასამთავრობო ორგანიზაციების წარმომადგენლებს, დაუყოვნებელი რეაგირება მოახდინონ აღნიშნულ ფაქტთან დაკავშირებით და ყველაფერი იღონონ, რათა საქართველოს მოსახლეობას მისცენ შესაძლებლობა ობიექტური, ხელისუფლებისგან თავისუფალი სიტყვა გაიგოს", - აღნიშნავს ბურჯანაძის პარტია.
"დემოკრატიული მოძრაობა" მიიჩნევს, რომ მსგავსი ქმედებებით ხელისუფლება კიდევ უფრო დააჩქარებს მოვლენების რევოლუციური გზით განვითარებას.
"ამ ხელისუფლების უგუნური ქმედებების წყალობით ქვეყანაში რევოლუცია გარდაუვალი ხდება", - მიიჩნევენ "დემოკრატიული მოძრაობის" წევრები.
