რუსეთის არმიისა და ფლოტის ახალი ტექნიკით შეიარაღების ამბიციური გეგმა პირველივე ეტაპზე ჩავარდა. ამჯამად შესაძლოა იმ პირთა პასუხისმგებლობის საკითხი დადგეს, ვინც ახალი პროგრამის ჩავარდნაშია დამნაშავე. ექსპერტები აცხადებენ, რომ რუსული თავდაცვა კვდება. ინფორმაციას ამის შესახებ რუსული მედია ავრცელებს.
მათი ინფორმაციით, გასულ წელს რუსეთის თავდაცვის სამინისტროს მიერ მიცემული სახელმწიფო შეკვეთა მხოლოდ 30 % შესრულდა - არმიამ და ფლოტმა ყველაზე საჭირო რამ არ მიიღო: წყალქვეშა ნავები, სასწავლო თვითმფრინავები და ჯავშანტექნიკა. ამას ზედ ემატება "როსკოსმოსის" დანაკარგები, რომლებიც ხაზინას რამდენიმე მილიარდი რუბლი დაუჯდა.
ექსპერტები აცხადებეn, რომ ასეთ პირობებში რუსეთის შეიარაღებული ძალების გაყვანა მსოფლიოს მოწინავე ჯარების დონეზე ვერ მოხერხდება, თუკი ამისთვის განსაკუთრებული ძალისხმევა არ იქნა მიღებული. თუმცა ეს ძალისხმევაც შესაძლოა დაგვიანებული აღმოჩნდეს, ვინაიდან შეიარაღების სახელმწიფო პროგრამა 2020 წლამდე, რომლისთვისაც 20 ტრილიონი რუბლის დახარჯვაა გათვალისწინებული, უკვე მიღებულია და ყველა პრიორიტეტი მასში გაწერილია.
გეგმის ჩავარდნის შესახებ რუსეთის თავდაცვის მინისტრმა ანატოლი სერდიუკოვმა რუსეთის პრეზიდენტს რამდენიმე დღის წინ აცნობა. დოკუმენტის შინაარსის შესახებ "ნეზავისიმაია გაზეტამ" შეიარაღების დეპარტამენტის სახელმწიფო შეკვეთის ფორმირების სამმართველოს ხელმძღვანელის მოადგილიდან ბორის ნაკონეჩნისგან გაიგო.
მისი თქმით, საბოლოო ჯამში არმიამ ვერ მიიღო 20380 პროექტის კორვეტი, 995 პროექტის ორი წყალქვეშა ნავი. დაგეგმილი 9 "იაკ-130" ტიპის ვერტმფრენიდან მიღებულია მხოლოდ 6. 515 ჯავშანმანქანიდან მიღებულია 78. რუსეთის თავდაცვის სამინისტრო ამ დანაკლისში თავდაცვის სამეწარმეო კომპლექსის დაწესებულებებს ადანაშაულებს. სედიუკოვი თავის ანგარიშში ამ დაწესებულებების ხელმძღვენელების მიმართ ზომების მიღებას ურჩევს.
თუმცა, გაზეთის ინფორმაციით, აღნიშნულში ბრალი თავდაცვის სამინისტროსაც მიუძღვის, თუმცა თავდაცვის სამინისტროს ამის აღიარება არ უნდა. საქმე ისაა, რომ რუსეთის თავდაცვის სამინისტროს აქვს დიდი დავალიანება დანაკლისში თავდაცვის სამეწარმეო კომპლექსის დაწესებულებების მიმართ უკვე შესრულებულ სამუშაოზე.
დანაკლისში თავდაცვის სამეწარმეო კომპლექსში უკიდურესად უკმაყოფილონი არიან რუსეთის თავდაცვის სამინისტროს მიერ წარმოებული პოლიტიკით, რომელიც პროდუქციის ღირებულებას 2009 წლის ფასებით აწესებს.
ექსპერტები, რომლებიც რუსეთის თავდაცვის სფეროს პრობლემებს კარგად იცნობენ, "ნოვაია გაზეტასთან" მთელ რიგ იმ მიზეზებზე საუბრობენ, რომელთა გამოც სავარაუდოდ არმიის შეიარაღების გრანდიუზული გეგმა ჩავარდა. მათი თქმით, ამ დარგის საწარმოების მესამედი, ფაქტობრივად, გაკოტრებულია. ამასთან, რუსეთში ათჯერ ნაკლები ფული იხარჯება კვლევებზე, ვიდრე მსოფლიოს სხვა განვითარებულ ქვეყნებში. ინვესტიციები კი ძირითად ფონდებში კადრების მომზადებაზე ხუთჯერ ნაკლებია.
"70 % ტექნოლოგიისა, რომლებიც წარმოების მოთხოვნებს უზრუნველყოფენ ფიზიკურად და მორალურად მოძველებულია. დანადგარების პარკის ნახევარზე მეტი 100%-ით გაცვეთილია. თავდაცვის სამეწარმეო კომპლექსის დაწესებულებებში მუშათა საშუალო ასაკი 50 წელია, თავდაცვის სამეცნიერო-კვლევით ინსტიტუტებში კი - 60 წელი", - აცხადებს რუსეთის მეცნიერებათა აკადემიის მსოფლიო ეკონომიკისა და საერთაშორისო ურთიერთობების ინსტიტუტის მთავარი მეცნიერ-თანამშრომელი ვლადიმერ დვორკინი.
