საქართველოს დელეგაცია ჟენევის მოლაპარაკებების მე-15 საუნდზე სამი ძირითადი საკითხის დაყენებას გეგმავს.
როგორც საქართველოს საგარეო საქმეთა მინისტრის მოადგილემ სერგი კაპანაძემ დღეს გამართულ პრესკონფერენციაზე განაცხადა, საქართველოს დელეგაცია მოითხოვს, რუსეთმა აიღოს ძალის გამოუყენებლობის ვალდებულება საქართველოს მიმართ, ისევე, როგორც ეს ვალდებულება საქართველოს პრეზიდენტმა აიღო.
"რუსეთის ხელისუფლების საუბარი იმაზე, რომ საქართველომ ხელი უნდა მოაწეროს შეთანხმებას მარიონეტულ რეჟიმებთან, ეს ქართული მხარისთვის მიუღებელია", - განმარტა კაპანაძემ.
რაც შეეხება დანარჩენ საკითხებს, ქართული მხარის მეორე მოთხოვნა ოკუპირებულ ტერიტორიებზე უსაფრთხოების საერთაშორისო მექანიზმების განლაგებას შეეხება. როგორც კაპანაძემ განმარტა, ეს გულისხმობს საერთაშორისო სამშვიდობო და საერთაშორისო საპოლიციო ძალების შესვლას აფხაზეთსა და ე. წ. სამხრეთ ოსეთში.
"ეს, პირველ რიგში, ეხება ევროკავშირის დამკვირვებლების შესვლას საქართველოს ოკუპირებულ ტერიტორიებზე", - აღნიშნა მინისტრის მოადგილემ.
თბილისის მესამე მოთხოვნა კი დევნილების დაბრუნების საკითხს შეეხებ.
"ამ მიმართულებით კონკრეტული ნაბიჯები უნდა გადაიდგას. იმედი გვაქვს, რომ რუსეთი ამ რაუნდზე მაინც მიიღებს გარკვეულ გადაწყვეტილებას და შეთანხმება მიღწეული იქნება",-დასძინა კაპანაძემ.
აღსანიშნავია, რომ ქართული მხარე მოუწოდებს რუსეთს საქართველოში გასული წლის შემოდგომაზე მომხდარი ტერაქტების გამოძიებასთან დაკავშირებით თანამშრომლობისკენ.
