საქართველოში მთლიანი შიდა პროდუქტის ზრდის ტემპმა 2011 წლის იანვარში, წინასწარი შეფასებით, 9,3%-ით მოიმატა. ამის შესახებ საქართველოს სტატისტიკის ეროვნული სამსახურის "საქსტატი" აღმასრულებელმა დირექტორმა ზაზა ჭელიძემ განაცხადა.
მისი განმარტებით, ეკონომიკის ზრდა ძირითადად განაპირობა სამშენებლო სექტორისა და საფინანსო სექტორის ზრდამ. ჭელიძის თქმით, ამ პერიოდში სამშენებლო სექტორი 62,5%-ით გაიზარდა, რაც იმის მანიშნებელია, რომ სამშენებლო სექტორი გააქტიურდა, ამავდროულად 30%-ით გაიზარდა საფინანსო სექტორი.
ჭელიძე აცხადებს, რომ ეკონომიკურ ზრდაზე გავლენას ნაწილობრივ პროდუქციაზე გაზრდილი ფასები ახდენს, თუმცა იგი დასძენს, რომ ეკონომიკური ზრდის მაჩვენებლის გამოთვლისას ფასების ცვალებადობა გათვალისწინებულია.
ჭელიძე ვარაუდობს, რომ იანვრის საპროგნოზო მაჩვენებლის მიხედვით, პირველი კვარტალი წარმატებული ზრდით დასრულდება.
"საქსტატის" ხელმძღვანელის განმარტებით, "საქსტატმა" საპროგნოზოდ წინასწარი მონაცემების შეფასება დაიწყო. აღნიშნული მონაცემების საზოგადოებისთვის გაცნობა გარკვეულ სურათს შექმნის.
ჭელიძის თქმით, საქართველოში 2011 წლის იანვარში 3 973 ახალი კომპანია დარეგისტრირდა, რაც გასული წლის ანალოგიურ პერიოდთან შედარებით 34%-ით მეტია. ოფიციალური სტატისტიკით, დამატებული ღირებულების გადასახადის გადამხდელ საწარმოთა ბრუნვამ 2011 წლის იანვარში 2,619 მლნ ლარი შეადგინა, რაც 39,7%-ით მეტია გასული წლის იმავე პერიოდში არსებულ მონაცემებთან შედარებით.
ოფიციალური სტატისტიკით, საქართველოში 2010 წლის სამ კვარტალში მთლიანი შიდა პროდუქტი (მშპ) გასული წლის ანალოგიურ პერიოდთან შედარებით 6,5%-ით გაიზარდა. 2010 წლის პირველ კვარტალში ქვეყანაში მშპ-ი 3,9%-ით, მეორე კვარტალში - 8,7%-ით, მესამე - 6,7%-ით გაიზარდა.
"საქსტატი" 2010 წლის მშპ-ის ზრდის შესახებ ოფიციალურ მონაცემებს მარტში გამოაქვეყნებს.