ფრაქცია "ჩვენი თბილისის" წევრი, ჯანდაცვისა და სოციალურ საკითხთა კომისიის თავმჯდომარე ვიქტორ დოლიძე აღნიშნავს, რომ ჯანდაცვის მსოფლიო ორგანიზაციის საბოლოო დასკვნის მიხედვით, საქართველოში ბიზნესის წარმოება რთულია.
"საქართველოში ბიზნესის დაწყების სიმარტივით ჩვენი ხელისუფლება ხშირად სპეკულირებს და მოსახლეობას სიმართლეს უმალავს. ჯანდაცვის მსოფლიო ორგანიზაციის საბოლოო დასკვნაში აღნიშნულია, რომ ბიზნესის დაწყების სიიოლით საქართველო მსოფლიოს 129 ქვეყანას შორის მე-3 ადგილზეა, რაც ძალიან კარგია. ბიზნესი რომ დაიწყო ან ფორმა დააარსო, სულ რაღაც რამდენიმე წუთი გჭირდება. თუმცა ჯანდაცვის მსოფლიო ორგანიზაციის ამავე დასკვნაში აღნიშნულია, რომ, მართალია, საქართველოში ბიზნესის დაწყება ძნელი არ არის, მაგრამ მისი წარმოება რთულია",_ აღნიშნა დოლიძემ "ჯი-ეიჩ-ენთან" საუბრისას.
დოლიძემ საკრებულოში გამართულ ბრიფინგზე მსოფლიო ჯანდაცვის ორგანიზაციის კვლევის შედეგები წარადგინა, რომლის მიხედვითაც, მოსახლეობის ზრდის კოეფიციენტით, ორსულთა და ბავშვთა სიკვდილიანობით საქართველოში საგანგაშო მაჩვენებელია. ამასთან, ხელისუფლება ჯანდაცვისთვის ერთ სულ მოსახლეზე წელიწადში მხოლოდ 35 დოლარს გამოყოფს.
