საქართველოს პრეზიდენტი მიხეილ სააკაშვილი აცხადებს, რომ გერმანია საქართველოს ნატოს წევრობის გზაზე ყველაზე დიდი წინააღმდეგობაა. ეს განცხადება საქართველოს პრეზიდენტმა ლიტვურ ჟურნალ "Valstybė"-ისათვის მიცემულ ინტერვიუში გააკეთა.
"გერმანია ყველაზე დიდი წინააღმდეგობაა, თუმცა ეს ალოგიკურიც კი ჩანს. ნებისმიერ შემთხვევაში ჩვენ ვაპირებთ განვაგრძოთ სვლა ევროატლანტიკური ინტეგრაციის მიმართულებით და აქტიური სწრაფვაც გვექნება ამისკენ. ბედის ირონიით, უკვე ყველა აღიარებს, რომ საქართველო - კარგი მოსწავლეა, თუმცა მას მომდევნო კლასში გადასვლის უფლებას არ აძლევენ. ეს კი კარგი არ არის", _ აცხადებს მიხეილ სააკაშვილი და აღნიშნავს, რომ მისთვის უცნობია თუ როდის გახდება საქართველო ნატოს წევრი.
"დასვით ეს კითხვა ვაშინგტონში, ბრიუსელში და განსაკუთრებით - ბერლინში. მიმაჩნია, რომ ჩვენ უნდა მოვახდინოთ იმის დემონსტრირება, რომ წინ წავიწიეთ, უნდა ვიაროთ წინ, ვიმუშაოთ, ვიმუშაოთ და ადრე თუ გვიან ჩვენ ვიქნებით ნატოში", _ აცხადებს საქართველოს პრეზიდენტი.
