ოპოზიცია დღეს საქართველოში არც თუ ისე საკმარისად ძლიერია მე რომ მინდა. ჩვენ გვჭირდება ისეთო ოპოზიცია, რომელიც ხელისუფლებაში მოსვლის შემდეგ ქვეყნისათვის ტრაგიკული კატასტროფა არ გახდება. განაცხადა საქართველოს პრეზიდენტმა მიხეილ სააკაშვილმა ლიტვურ ჟურნალ " Valstybė "-ისათვის მიცემულ ინტერვიუში.
"მიუხედავად ამისა, ოპოზიცია რომელიც დღეს არის ჩვენთან იმაზე გაცილებით უკეთესია, რომელიც რამდენიმე წლის წინ იყო, რომელიც მზად იყო საქართველო რუსეთისათვის მიეყიდა", _ აცხადებს მიხეილ სააკაშვილი.
მისივე თქმით, მას ადანაშაულებენ იმაში, რომ ოპოზიციას არ შეუძლია თავისი თავი გამოხატოს მასობრივი ინფორმაციის საშუალებებში, მაგრამ არაერთმა კვლევამ ცხადჰყო, რომ საქართველოში არსებულ ოპოზიციას აქვს ყველა საჭირო არხი იმისათვის, რომ თავისი აზრი გამოხატოს.
"პრობლემა ოპოზიციის უფლებების არქონაში კი არ არის, არამედ იმაშია, რომ ხშირად ადამიანებს არ მოსწონთ მათი ლოზუნგები: რაც უფრო ხმამაღლა ყვირის ოპოზიცია, მით უფრო ცუდად გამოიყურება იგი".
"ნაწილობრივ ვეთანხმები დასავლეთის შენიშვნებს, იმასთან დაკავშირებით, რომ ამ სფეროში ხარვეზები გვაქვს, იმიტომ, რომ ჩვენ უბრალოდ, ჯერ ვერ მივაღწიეთ შესაფერის განვითარებას. მეორეს მხრიდან კი ექსპერტები, რომლებიც საქართველოში არსებული ოპოზიციის მდგომარეობას სწავლობენ ხშირად ვერ იგებენ ძველი საბჭოთა პოლიტიკის წესებს - რაც შეიძლება მეტი სიცრუე", _ აცხადებს საქართველოს პრეზიდენტი და დასძენს, რომ ხშირად ეს ბრალდება ხდება დასავლეთისათვის საბაბი თუ რატომ არ სურთ მათ ჩვენ დაგვეხმარონ.
"ბოლო გამოკვლევები ცხადჰყოფს, რომ ოპოზიციის ძალა და პოპულარობა იზრდება, ამიტომაც მიუხედავად იმისა, რომ საქართველოს დღეს არ შეუძლია ძლიერი ოპოზიციით მოიწონოს თავი, მომავალს მაინც ოპტიმისტურად ვუყურებ და მიმაჩნია, რომ საკმაოდ მალე იგი გაძლიერდება იმდენად, რომ შეეძლება არჩევნებში გამარჯვება და ქვეყნის ადეკვატურად მართვა", _ აცხადებს მიხეილ სააკაშვილი.
