პარლამენტის წევრს, ჯონდი ბაღათურიას აინტერესებს, როგორ აღმოჩნდა დავით კეზერაშვილის ხელში ლატარიის კომპანია და ნიშნავს თუ ეს, რომ კეზერაშვილი ამ სფეროში მონოპოლისტად ჩამოყალიბდა. ეს განცხადება ბაღათურიამ დღეს სესიაზე კანონპროქტის "ლატარიების და აზარტული თამაშების შესახებ~ კანონში ცვლილებების შეტანის პროექტის განხილვისას გააკეთა.
ცვლილების თანახმად, წამახალისებელი თამაშების მოწყობასთან დაკავშირებით ახალი რეგულირება წესდება. წამახალისებელი თამაშის მოწყობის ნებართვისთვის დაინტერესებულმა პირმა უნდა მიმართოს ფინანსთა სამინისტროს მომსახურეობის სააგენტოს, რომელიც დაწერს დასკვნას, თამაშის პირობები რამდენად შეესაბამება საინისტროს მიერ დადგენილ ნორმებს, ამისთვის კი პირს უწევს 10 ათასი ლარის გადახდა. აქამდე ეს ნორმა არ არსებობდა და ბაღათურიას განცხადებით, ამ ნორმის შემოღება უკავშირდება კეზერაშვილის ინტერესს.
ბაღათურია მთავრობისგან ითხოვს განმარტებას, როგორ აღმოჩნდა ლატარიების კომპანია მხოლოდ ერთი ადამიანის ხელში და ახლა წამახალისებელი გათამაშების მოწყობის წესის გართულება ხომ არ შექმნის იმ პრობლემას, რომ სხვა პირები "ამ სფეროს ვეღარ გაეკარებიან.~
ამ კითხვის საპასუხოდ ფინანსთა მინისტრის მოადგილემ ირაკლი ღვალაძემ მხოლოდ ის განაცხადა, რომ კეზერაშვილს ამ კომპანიასთან "არანაირი სამართლებრივი კავშირი არა აქვს.~
დარგობრივი ეკონომიკის კომიტეტის თავმჯდომარემ გიორგი მელაძემ კი დაინტერესებულ პირებს ურჩია, მოიძიონ, ვინ არიან ამ კომპანიის დამფუძნებელი პირები და გაირკვევა, ეკუთვნის თუ არა ეს კომპანია კეზერაშვილს.