ზესტაფონში ღია და დახურული ტიპის თანამედროვე სტანდარტების სავაჭრო კომპლექსი აშენდება. საუბარია, არანაკლებ, 600 სავაჭრო ადგილზე გათვლილი აგრარული ბაზრის მოწყობაზე.
პროექტის განსახორციელებლად ინვესტორი 2,5 მლნ. დოლარის ინვესტიცია უნდა განახორციელოს. ამ მიზნით, კომპანია "მ.ს"-მ ეკონომიკისა და მდგრადი განვითარების სამინისტროსგან, ოფიციალური წერილის საფუძველზე, ზესტაფონში, ჭანტურიას ქუჩა #42-ში, სახელმწიფო საკუთრებაში არსებული 89153 კვ.მ არასასოფლო-სამეურნეო დანიშნულების მიწის ნაკვეთის შესყიდვა ითხოვა.
ქობალიას უწყებამ აღნიშნული საკითხი მთავრობის სხდომაზე განსახილველად უკვე გაიტანა. 89153 კვ.მ ფართში კომპანია "მ.ს"-ს 750 ათასი ლარის გადახდა მოუწევს.
საპრივატიზებო პირობების თანახმად, ინვესტორი ვალდებულია საპრივატიზებო თანხის გადახდა შემდეგი გრაფიკის მიხედვით განახორციელოს: 1-ელ მარტამდე 350 ათასი ლარი, ხოლო 1-ელ ივნისამდე 400 ათასი ლარი გადაიხადოს.