რაც გაჟღერდა გვარამიას მხრიდან, თანხვედრაშია იმ კონტექსთან, რაც რამდენიმე დღის წინ გააჟღერა მისივე პარტიის წარმომადგენელმა ბატონმა ბარამიძემ, ეს არის ქვეყნის ეროვნული ინტერესების ღალატი, როგორ შეიძლება სამაჩაბლოსა და აფხაზეთის კონფლიქტების შედარება სომხეთის მაგალითთან, – ამის შესახებ პარტიის „გახარია საქართველოსთვის“ წევრმა, დეპუტატმა ქეთევან ბაკარაძემ განაცხადა.
ჩემთვის, როგორც ამ ქვეყნის ერთ-ერთი რიგითი მოქალაქისთვის და აფხაზეთის საზოგადოების წარმომადგენლისთვის, ესაა აბსოლუტურად მიუღებელი და ნამდვილად ქვეყნის ეროვნული ინტერესების ღალატი. ამ თვის განმავლობაში ძალიან ხშირად გვესმის პაპუაშვილისგან, კობახიძისგან – აგვისტოს თვეში , რომელი თვეც საკმაოდ მტკივნეული და მძიმე თვეა ჩვენი ქვეყნისთვის, რომ თითქოს ჩვენმა ქვეყანამ დაიწყო ომი, ესაა ყველაზე დიდი დანაშაული, ყველაზე დიდი ბრალდება და ეწინააღმდეგება ჩვენი ქვეყნის სუვერენიტეტს, ეროვნულ ინტერესებს. ჩვენთვის აბსოლუტურად სულერთია კობახიძე-პაპუაშვილის დუეტი იქნება მსგავსი სისულელის გამჟღერებელი თუ გვარამია-ბარამიძის დუეტი. ყველაფერი, რაც ეწინააღმდეგება ჩემი ქვეყნის ტერიტორიული მთლიანობის აღდგენას, აბსოლუტურად მიუღებელია და არის ეროვნული ინტერესების ღალატი“, – განაცხადა ბაკარაძემ.
ცნობისთვის, ნიკა გვარამიამ სატელევიზიო ეთერში განაცხადა, რომ „ძალიან მნიშვნელოვანია ისტორიული მეხსიერება ერისთვის, მაგრამ ტრავმული მეხსიერება საფრთხის შემცველია“ და ფაშინიანით იმიტომაა აღფრთოვანებული, რომ მან „ტრავმების დამარცხება შეძლო“. ამ თემაზე საუბრისას ის აღნიშნავს, რომ ფაშინიანმა „არარატი წაშალა ბეჭდიდან, შტამპიდან იმ მიზეზით, რომ თურქეთთან და აზერბაიჯანთან სომხეთს დაულაგდებოდა ურთიერთობა და ევროკავშირისკენ მეტი პერსპექტივა ექნებოდა“. მისივე თქმით, იგივე გააკეთა და კიდევ უფრო მძიმე ყარაბაღთან დაკავშირებით.
„რეალურად, ყარაბაღი ხომ ჩაბარება იყო? იყო ომი, ასე შემდეგ, გასაგებია ეს ყველაფერიც, მაგრამ, საბოლოო ჯამში, სომხეთმა თქვა, რომ ნუ, მომაშორეთ, წაიღეთ, იმიტომ, რომ მართლა მათი იყო. ისტორიული ყარაბაღი, მასე ისტორიულად, ლორეზეც შეგვიძლია, ქართველები ვედავოთ სომხებს,“- აღნიშნა გვარამიამ და დასძინა, რომ მისი ეს განცხადება არ არის აფხაზეთთან პარალელი და არ უნდა გაიგოს ვინმემ არასწორად.
„ტრავმის ნაწილზე ვამბობ. აფხაზეთი ჩვენი ტერიტორიაა ყველა აღიარებით და ყარაბაღი არ ყოფილა სომხეთის ტერიტორია, არცერთი აღიარებით“,- აღნიშნა გვარამიამ.
