უკრაინის პრეზიდენტმა ვოლოდიმირ ზელენსკიმ განაცხადა, რომ პოლონეთის პრემიერ-მინისტრ დონალდ ტუსკითან შეხვედრისას მხარეებმა განიხილეს ორ ქვეყანას შორის ისტორიული დიალოგი, თავდაცვის სფეროში თანამშრომლობა და პოლონეთში მცხოვრები უკრაინელების უსაფრთხოება.
ზელენსკი და ტუსკი ოთხშაბათს ლუბლინში შეხვდნენ ერთმანეთს. ეს იყო მათი პირველი შეხვედრა მას შემდეგ, რაც უკრაინა-პოლონეთის ურთიერთობები დაიძაბა უკრაინის პრეზიდენტის გადაწყვეტილების გამო, ერთ-ერთი სამხედრო დანაყოფისთვის მიენიჭებინათ სახელი, რომელიც უკრაინის მეამბოხეთა არმიას უკავშირდება.
შეხვედრის ერთ-ერთი მთავარი თემა კიევსა და ვარშავას შორის ისტორიული დიალოგი იყო.
„განვიხილეთ უსაფრთხოების გამოწვევები, რომლებიც, სამწუხაროდ, ჩვენ ხალხსაც აქვს. მნიშვნელოვანია, უკრაინელებმა, რომლებმაც ომის გამო სახლები დატოვეს და პოლონეთში თავშესაფარი იპოვეს, თავი უსაფრთხოდ იგრძნონ“, – აცხადებს ზელენსკი.
ზელენსკის თქმით, მან პოლონეთის პრემიერ-მინისტრს ვაშინგტონში ვიზიტის შედეგები გააცნო, სადაც ის აშშ-ის პრეზიდენტ დონალდ ტრამპს შეხვდა.
მხარეებმა ასევე განიხილეს ორმხრივი ურთიერთობების საკითხები, მათ შორის თავდაცვითი თანამშრომლობა და უკრაინის ქალაქებისა და თემების დაცვა რუსეთის სასტიკი თავდასხმებისგან.
