20 ივლისის გამთენიისას რუსეთის ხელისუფლებამ განაცხადა, რომ მოსკოვის ოლქზე შეტევა 400-ზე მეტი უპილოტო საფრენი აპარატით განხორციელდა. სოციალურ ქსელებში გავრცელდა ცნობები აფეთქებებისა და ხანძრების შესახებ მოსკოვის შემოგარენში, მათ შორის, პოდოლსკში მდებარე Wildberries-ის ლოგისტიკურ ცენტრ „კოლედინოში“.

რუსი პროპაგანდისტების ცნობით, მოსკოვის ოლქში სარაკეტო განგაში გამოცხადდა. მოსკოვის მოსახლეობა გააფრთხილეს, რომ შესაძლოა ინტერნეტის მუშაობაში შეფერხებები ყოფილიყო.

 Telegram-არხების ინფორმაციით, სარაკეტო განგაში ასევე გამოცხადდა იაროსლავის, ტვერის, ვლადიმირის, ივანოვოს, ნოვგოროდის, ვოლოგდის, ბელგოროდის, კურსკის, ლიპეცკის, კალუგის, ვორონეჟის, ტამბოვისა და ტულის ოლქებში.

მოსკოვის მერმა სერგეი სობიანინმა განაცხადა, რომ საჰაერო თავდაცვის ძალებმა 38 უპილოტო აპარატი ჩამოაგდეს, რომლებიც მოსკოვისკენ მიფრინავდნენ.

შეტევის შესაძლო შედეგებზე სობიანინს ინფორმაცია არ გაუვრცელებია. მისი თქმით, „ჩამოვარდნილი ნამსხვრევების ადგილებზე საგანგებო სამსახურების სპეციალისტები მუშაობენ“.

ამასთან, სოციალურ ქსელებში გავრცელდა ფოტოები და ვიდეოები, რომლებზეც, მოსკოვის ოლქში აფეთქებებისა და დარტყმების შედეგებია ასახული.

„როსავიაციამ“ მოსკოვის აეროპორტებში დროებითი შეზღუდვები აამოქმედა.

საერთო ჯამში, რუსეთის ხელისუფლების ცნობით, მოსკოვთან მისადგომებზე 79 უპილოტო საფრენი აპარატი იქნა ჩამოგდებული.

ამასთან, Telegram-არხის, Exilenova+-ს ინფორმაციით, დრონებმა დარტყმა მიაყენეს Wildberries-ის ლოგისტიკურ კომპლექსს „კოლედინოს“ (მოსკოვის ოლქი), რომელიც კომპანიის ერთ-ერთი ყველაზე დიდი სადისტრიბუციო ცენტრია.