თურქეთის საგარეო საქმეთა მინისტრი ჰაქან ფიდანი ოთხშაბათს უკრაინაში ჩავა.
ამის შესახებ უკრაინის საგარეო საქმეთა მინისტრმა ანდრი სიბიჰამ განაცხადა.
სიბიჰა მიესალმა უკრაინის უმაღლესი რადის მიერ უკრაინასა და თურქეთს შორის თავისუფალი ვაჭრობის შესახებ შეთანხმების რატიფიცირებას და ფიდანის უკრაინაში ვიზიტი დააანონსა.
„გულწრფელად ვუხდი მადლობას დეპუტატებს ამ მნიშვნელოვანი გადაწყვეტილების მხარდაჭერისთვის. ეს შეთანხმება მრავალწლიანი დაჟინებული და ზოგჯერ რთული მუშაობის შედეგია, დღევანდელი კენჭისყრა კი ჩვენს ერთობლივ ძალისხმევას რეალურ მიღწევად აქცევს,“ - დაწერა სიბიჰამ.
მისი თქმით, შეთანხმება ახალ ეტაპს ხსნის ქვეყნებს შორის ვაჭრობის, ინვესტიციებისა და ეკონომიკური თანამშრომლობის გაფართოებაში, რაც ორივე ქვეყნის ბიზნესისა და მოქალაქეებისთვის ახალ შესაძლებლობებს შექმნის.
„ვულოცავ ჩემს მეგობარს, საგარეო საქმეთა მინისტრ ჰაქან ფიდანს და ყველას, ვინც ამ მნიშვნელოვანი შედეგის მიღწევაში წვლილი შეიტანა. მოუთმენლად ველი ხვალ უკრაინაში ჰაქანთან შეხვედრას, სადაც გავაგრძელებთ ჩვენი სტრატეგიული პარტნიორობის განვითარებას ყველა სფეროში, რომელიც ორმხრივ ინტერესს წარმოადგენს,“ - აღნიშნა სიბიჰამ.
