უკრაინამ რუსეთის ბელგოროდის ოლქში საბრძოლო მასალების საწყობსა და მართვის პუნქტებს დაარტყა.

უკრაინის შეიარაღებული ძალების გენერალური შტაბის ინფორმაციით, 8 ივნისსა და 9 ივნისის ღამეს უკრაინის თავდაცვის ძალებმა რუსეთისა და ოკუპირებულ ტერიტორიებზე მდებარე რამდენიმე სამხედრო ობიექტზე იერიშები მიიტანეს.

გენშტაბის ცნობით, რუსეთის ბელგოროდის ოლქში, პროხოროვკის რაიონში, განადგურდა საბრძოლო მასალების საწყობი. ძლიერი აფეთქების კადრები წინა დღეს სოციალურ ქსელებში რუსეთის მოქალაქეებმაც გაავრცელეს.

ასევე, დარტყმები განხორციელდა რუსული ძალების მართვის პუნქტებზე:

დონეცკის ოლქში ნიკოლსკოესა და შევჩენკოს რაიონებში; ბელგოროდის ოლქის ქალაქ ნაუმოვკაში; ისკრაში, კურსკის ოლქში.

გარდა ამისა, უკრაინულმა ძალებმა დაარტყეს რუსული არმიის უპილოტო საფრენი აპარატების მართვის პუნქტებს:

 დონეცკის ოლქში, ზაპოროჟიეს ოლქსა და ხერსონის ოლქში.

უკრაინის გენშტაბის განცხადებით, ოპერაცია რუსეთის სამხედრო შესაძლებლობების შემცირებას ისახავდა მიზნად.

ასევე ფედოროვკის რაიონში (დონეცკის ოლქი) განადგურდა მოწინააღმდეგის ლოგისტიკური ჰაბი, ასევე დაზიანდა მატერიალურ-ტექნიკური საშუალებების საწყობები მიხაილოვკაში (ლუჰანსკის ოლქი) და გიუნოვკაში (ზაპოროჟიეს ოლქი).

უკრაინის შეიარაღებულმა ძალებმა ასევე დაარტყეს მოწინააღმდეგის ცოცხალი ძალის თავმოყრის ადგილებს კურახოვოს, კალინოვოს, შევჩენკოსა და სტუპოჩკის რაიონებში (დონეცკის ოლქი), ნოვოგრიგოროვკაში (ზაპოროჟიეს ოლქი) და ისკრაში (რუსეთის კურსკის ოლქი).