2026 წლის იანვარ-აპრილში თბილისში პარკინგის ჯარიმებიდან ბიუჯეტში შესული თანხა 165%-ით გაიზარდა და 4 თვეში 7 მილიონი ლარი შეადგინა - ამის შესახებ "ლელო - ძლიერი საქართველოს" ერთ-ერთმა ლიდერმმა, გიორგი სიორიძემ ბრიფინგზე განაცხადა.
სიორიძის თქმით, მაშინ როცა კახა კალაძე თბილისელებს სითი პარკის გაუქმებას და გამართული პარკირების სისტემის შექმნას პირდებოდა, ამის ნაცვლად, დედაქალაქის მოსახლეობამ ჯარიმების გამოწერაზე ორიენტირებული თბილისი პარკინგი მიიღო.
"2026 წლის იანვარ-აპრილში თბილისში პარკინგის ჯარიმებიდან ბიუჯეტში შესული თანხა 165%-ით გაიზარდა და 4 თვეში 7 მილიონი ლარი შეადგინა.
კალაძე თბილისელებს სითი პარკის გაუქმებას და გამართული პარკირების სისტემის შექმნას პირდებოდა, მაგრამ ამის ნაცვლად, მივიღეთ ჯარიმების გამოწერაზე ორიენტირებული თბილისი პარკინგი, თუმცა ვერ მივიღეთ საპარკინგე ადგილები და ავტომობილის ალტერნატივის სახით კომფორტული საზოგადოებრივი ტრანსპორტი.
2017 წლიდან დღემდე, კალაძის მერობის პერიოდში თბილისში საპარკინგე ადგილების რაოდენობა მკვეთრად შემცირდა;
არ აშენებულა არცერთი მუნიციპალური პარკინგი, მაშინ როცა კალაძე ჯერ კიდევ 2017 წელს დებდა თბილისში მიწისქვეშა და მიწისზედა პარკინგების მოწყობის დაპირებას, ხოლო იქამდე, 2017 წლის მაისში დავით ნარმანია აცხადებდა, რომ დედაქალაქის მასშტაბით 10 მრავალდონიანი პარკინგი აშენდებოდა;
2018-2026 წლებში, თბილისის მერიის პარკირების ინსპექტორებმა მოქალაქეებს პარკირების 4 მილიონამდე ჯარიმა დაუწერეს;
2018-2026 წლებში პარკირების გადასახადის, ჯარიმების და საჯარიმო ავტოსაგდომზე გადაყვანის ღირებულების საფასურით სულ სახელმწიფომ 130 მილიონ ლარზე მეტი მიიღო.
აღსანიშნავია, რომ კალაძის ინიციატივით, 2022 წელს ზოგიერთი ჯარიმა 5-ჯერ გაიზარდა და უმრავლესობა კი - გაორმაგდა.
კალაძემ ასტრონომიულად გაზრდილი შემოსავლები პრობლემის გადაჭრის ნაცვლად, ბიუროკრატიის და პარტიული აქტივის კომფორტზე დახარჯა.
სრული საპარკინგე კრიზისი მივიღეთ დედაქალაქში და ეს არის კალაძის არაკომპეტენტური და კორუმპირებული მმართველობის სიმბოლო! ", - განაცხადა სიორიძემ.
