უკრაინის პრეზიდენტი ვოლოდიმირ ზელენსკი მიიჩნევს, რომ კრემლი ერთდღიანი ან რამდენიმე დღიანი ზავის მიღწევას ცდილობს, პირველ რიგში, იმისთვის, რომ მოსკოვში გამართული ყოველწლიური სამხედრო აღლუმი უკრაინის შესაძლო იერიშებისგან დაიცვას.
ამის შესახებ მან Bloomberg-თან ინტერვიუში განაცხადა.
„მათ სურთ, რომ აღლუმი რამდენიმე საათის განმავლობაში მშვიდად ჩატარდეს, შემდეგ კი შეტევები განაახლონ. ჩვენ არ გვინდა, რომ ნებისმიერი ზავი რუსეთის ფედერაციის მხრიდან ტაქტიკურ ტყუილად იქცეს,“ - აღნიშნა ზელენსკიმ.
ამასთან, მისი თქმით, იგი მხარს უჭერს იმ ინიციატივებს ზავის შესახებ, რომლებიც სამოქალაქო მოსახლეობის დაცვას უწყობს ხელს და ტყვეთა გაცვლას აჩქარებს.
„ჩვენ ყოველთვის დადებითად ვრეაგირებთ რუსეთთან რეალური ზავის შეთავაზებებზე, თუ ასეთი არსებობს,“ - განაცხადა მან.
შეგახსენებთ, რუსეთის პრეზიდენტის თანაშემწემ, იური უშაკოვმა განაცხადა, რუსეთის პრეზიდენტსა და აშშ-ის პრეზიდენტს შორის სატელეფონო საუბარი შედგა. უშაკოვის თქმით, პუტინმა ტრამპს 9 მაისის აღლუმთან დაკაშირებით უკრაინაში ცეცხლის დროებითი შეწყვეტა შესთავაზა. იური უშაკოვის თქმით, ტრამპმა ინიციატივას მხარი დაუჭირა .
