გაძვირება არის ტყუილი. პირიქით, შენელებულია ინფლაციური პროცესები, მაგრამ ჩვენ ამით არ ვკმაყოფილდებით, ჩვენი ამოცანაა, რომ ფასები შემცირდეს რამდენადაც ეს არის შესაძლებელი. კომისია ამ კვირაში ამთავრებს მუშაობას. სამუშაო პროცესი მთავრობაში გვექნება სამუშაო პროცესი და ამის შემდეგ უკვე საბოლოო გეგმით წარვდგებით საზოგადოების წინაშე.- ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.
ჟურნალისტმა მას ჰკითხა, რატომ გაძვირდა პარლამენტში შექმნილი, ფასების შემსწავლელი კომისიის მუშაობის პარალელურად ქვეყანაში ფასები.
კობახიძის თქმით, რა ფასებიც იყო 1 თვის წინ, იგივე ფასებია შენარჩუნებული ძირითად პროდუქტებზე
„ვაკვირდები ხოლმე, ვებგვერდზე დევს ფასები და რა ფასებიც იყო ერთი თვის წინ, იგივე ფასებია შენარჩუნებული, განსაკუთრებით, ძირითად პროდუქტებზე... კომპიუტერში ასახულია რეალური ფასები, რაც მაღაზიაში გვხვდება. რა გაძვირდა აბა? კვერცხი რა ღირდა და რა ღირს? ან კარაქი რა ღირდა და რა ღირს?“ - განაცხადა კობახიძემ, რაზეც მას ჟურნალისტმა უპასუხა, რომ კვერცხის ფასი 85 თეთრია.
„რა 85 თეთრი? წაგიყვანოთ და 4,60 ლარად გაყიდინოთ 10 კვერცხი?“ - უპასუხა პრემიერმა, რაზეც მას ჟურნალისტი კვლავ ჩაეკითხა, თუ იცოდა, ხორცი რა ღირდა.
„რა ღირს? მე გაყიდინებთ კონკრეტულ ფასში, რამდენშია თქვენ მითხარით და მე შეგისწორებთ. მე წაგიყვანთ და საქონლის რბილ ხორცს და ღორის რბილ ხორცს ნახევარ კილოგრამს 10 ლარში გაყიდინებთ“, - განაცხადა კობახიძემ, რაზეც მას ჟურნალისტი კვლავ ჩაეკითხა, თუ სად ყიდულობს ის ამ პროდუქტებს.
„ნახევარ კილოგრამს გაყიდინებთ 10 ლარში - საქონლის რბილი ხორცი და ღორის რბილი ხორცი. 10 ლარად გაყიდინებთ, თქვენ თქვით 40. წაგიყვანთ მაღაზიაში, როგორც კი დასრულდება ჩაწერა, გაჩვენებთ ფასებს, მათ შორის, ვებ-გვერდზე“, - განაცხადა კობახიძემ.
