საქართველოდან არანაირი მოთხოვნა ან ზარი არ ყოფილა, მაგრამ, მეორე მხრივ, ჩვენ გვაქვს საერთო დღის წესრიგი, რომელზეც ვმუშაობთ, ამის შესახებ სომხეთის პრემიერ-მინისტრმა ნიკოლ ფაშინიანმა ბრიფინგზე განაცხადა. მან უპასუხა შეკითხვას, სთხოვა თუ არა საქართველომ ევროპარლამენტში გამოსვლისას ეთქვა, რომ სომხეთის ევროკავშირში გაწევრიანების მთავარი დაბრკოლება ევროკავშირსა და საქართველოს შორის პოლიტიკური დიალოგის გაყინვაა.
„მე ევროპარლამენტში ტრიბუნიდან ჩემი წუხილი გამოვთქვი, რადგან, ჩვენ ნამდვილად შეშფოთებულები ვართ ევროკავშირსა და საქართველოს შორის ურთიერთობებში არსებული სიტუაციით. ეს გვაწუხებს“, - განაცხადა ფაშინიანმა.
ცნობისათვის, სომხეთის პრემიერ-მინისტრმა ევროპარლამენტში სიტყვით გამოსვლისას განაცხადა: „სომხეთის ევროკავშირში ინტეგრაციის გზაზე ამჟამად ყველაზე დიდი პრობლემა ევროკავშირსა და საქართველოს შორის პოლიტიკური დიალოგის გაყინვაა”
