აშშ-ის პრეზიდენტმა დონალდ ტრამპმა ავსტრალიას მოუწოდა, ირანის ქალთა საფეხბურთო გუნდს თავშესაფარი მისცეს.
„ავსტრალია საშინელ ჰუმანიტარულ შეცდომას უშვებს ირანის ქალთა ეროვნული საფეხბურთო ნაკრების ირანში იძულებით დაბრუნებით, სადაც მათ, დიდი ალბათობით, მოკლავენ. ნუ გააკეთებთ ამას, ბატონო პრემიერ-მინისტრო, მიეცით მათ თავშესაფარი. თუ ამას არ გააკეთებთ, შეერთებული შტატები მიიღებს მათ. “, - წერს ტრამპი Truth Social-ზე.
მედიის ცნობით, ირანის ეროვნული ნაკრების ხუთმა მოთამაშემ უკვე დატოვა გუნდი და ავსტრალიის პოლიციის მიერ უსაფრთხო ადგილას არიან გადაყვანილი.
ტურნირზე ირანის ნაკრების ფინალური მატჩის შემდეგ, პოლიცია ხუთ სპორტსმენს დაეხმარა სასტუმროს დატოვებაში, სადაც გუნდი იმყოფებოდა.
ავსტრალია აზიის თასს მასპინძლობს. ტურნირი მაშინ დაიწყო, როდესაც აშშ-მა და ისრაელმა ირანის წინააღმდეგ შეტევა დაიწყეს. ირანის ქალთა ეროვნული საფეხბურთო ნაკრების ფეხბურთელებმა ტურნირის პირველი მატჩისას ჰიმნი არ შეასრულეს. ირანის ეროვნული ნაკრები ტურნირს კვირას გამოეთიშა.
