გერმანიის თავდაცვის მინისტრმა გამორიცხა გერმანიის მონაწილეობა ირანთან ომში და შეშფოთება გამოთქვა კონფლიქტიდან „გამოსვლის სტრატეგიის“ არარსებობის გამო.
„გერმანია ამ ომში არ მიიღებს მონაწილეობას. გერმანია კონფლიქტის მხარე არ არის“, - განაცხადა ბორის პისტორიუსმა ბუნდესტაგში დებატების დროს.
მისი თქმით, გერმანია „ყველაფერს გააკეთებს დეესკალაციისა და ძალადობის შემდგომი გავრცელების შესაკავებლად“. მისივე თქმით, ის ინარჩუნებს კონტაქტს კოლეგებთან ისრაელში, აშშ-სა და ევროკავშირში.
მინისტრმა ხაზი გაუსვა, რომ საჭიროა საომარი მოქმედებების შეწყვეტის შემდგომი პერიოდის გეგმა.
„ისტორია გვასწავლის, რომ ომის დაწყება უფრო ადვილია, ვიდრე მისი დასრულება. ეს ნიშნავს, რომ საჭიროა მკაფიო გამოსავლის სტრატეგია - და მე ამჟამად ასეთს ვერ ვხედავ. ილუზორულია ვიფიქროთ, რომ რეგიონში კონფლიქტების მოგვარება მხოლოდ სამხედრო ძალით და მხოლოდ სამხედრო გზით შეიძლება“, - დასძინა მან.
