“აწესებენ სანქციებს, იღებენ არაფრისმთქმელ რეზოლუციებს. არანაირი არგუმენტი არ არსებობს. მხოლოდ არასამართლიან დამოკიდებულებას, მუქარასა და შანტაჟს ვხედავთ”, - ამის შესახებ დედაქალაქის მერმა, კახა კალაძემ ევროპარლამენტის რეზოლუციის საკითხზე კომენტირებისას ისაუბრა.
როგორც მან მედიასთან საუბრისას აღნიშნა, ევროპელი ბიუროკრატების მოწოდება, რომ “ქართული ოცნების” დამფუძნებელი ბიძინა ივანიშვილი და პარტიის ლიდერები დაასანქცირონ, არის უსამართლო დამოკიდებულება.
“რამდენჯერ უნდა დაასანქცირონ ბიძინა ივანიშვილი და რამდენჯერ უნდა დაგვასანქცირონ ჩვენ? ამდენი წელია ერთსა და იმავე ადგილს ტკეპნიან, აწესებენ სანქციებს, იღებენ არაფრისმთქმელ რეზოლუციებს. არანაირი არგუმენტი არ არსებობს და არის მხოლოდ და მხოლოდ არასამართლიანი დამოკიდებულება, მუქარა, შანტაჟი. ეს არის სამწუხარო რეალობა. ევროპული ბიუროკრატია ისეთ მძიმე მდგომარეობაშია, რომ დარწმუნებული ვარ, ბევრი რამე შეიცვლება”, - განაცხადა კახა კალაძემ.
რაც შეეხება დიდი ბრიტანეთის მიერ ტელეკომპანიების “იმედისა” და “პოსტვ”-ის დასანქცირებას, დედაქალაქის მერის თქმით, არც ამ შემთხვევაში აქვთ არგუმენტი.
„დეზინფორმაცია რა იყო, რომელიც აღნიშნულმა ტელეკომპანიებმა გაავრცელეს? შეგიძლიათ მითხრათ? არაფერს ნიშნავს ეს ჩემთვის, დიდი ბრიტანეთი რას მიიჩნევს და რას - არა. წლების წინ, მახსოვს, როცა უცხოელი ბიუროკრატი რამეს იტყოდა საქართველოსთან დაკავშირებით, რაც არ უნდა სისულელე ეთქვა, ეს იყო სრული ჭეშმარიტება, ეს დამოკიდებულება იყო. დღეს აბსოლუტურად სხვა ვითარებაა ქვეყანაში, ქვეყნის შიგნითაც, მსოფლიოშიც, ხედავთ რა პროცესებიც მიდის. არანაირი სამართლებრივი საფუძველი არ არსებობს... დაგისვით შეკითხვა და ვერ გამეცით პასუხი. მითხარით ერთი კონკრეტული მაგალითი, რა იყო გავრცელებული არასწორად, სიცრუე და ა.შ.?
ეს დამოკიდებულება ზოგადად, ქვეყანასთან მიმართებით, არ არის პირველი შემთხვევა, ეს არასამართლიანი დამოკიდებულება კატეგორიულად მიუღებელია. ჩვენ ყველა ქვეყანას, მათ შორის, ევროკავშირის ქვეყნებსაც პატივს ვცემთ, მაგრამ პატივი უნდა სცენ ჩვენს დამოუკიდებლობას, ჩვენს სუვერენიტეტს. ვიღაც შეიძლება უფრო დიდი ქვეყანა იყოს, უფრო დიდი ეკონომიკით იყოს, მაგრამ უფლება არ აქვს, ქვეყნის შიდა პოლიტიკურ საქმიანობაში ჩაერიოს. რაც გაჟღერდა „იმედთან“ და „პოსტივისთან“ დაკავშირებით, ეს არის არასამართლიანი დამოკიდებულება. რომ ჩავიდეთ და ვიკითხოთ ძირეულად, რა არის პრობლემა, რატომ აღნიშნული ტელევიზიები? პასუხი არ არსებობს, არ არსებობს არგუმენტი...რა შეთქმულების თეორიები, მოუსმინეთ განცხადებებს და ნახეთ, რა პროცესები მიდის, რა შეთქმულების თეორიებს ეძებთ? პირდაპირ საუბრობენ, რაც სამწუხროდ, დღეს ხდება უკრაინაში, მსოფლიოში, როგორ წარიმართა ეს პროცესები და ა.შ.“, - განაცხადა კალაძემ.
