თამარ ბაჩალიაშვილის ოჯახი საქმის გამოძიების განახლებას ითხოვს. ოჯახმა შესაბამისი განცხადებით პროკურატურას მიმართა. მათი პოზიციაა, რომ გამოძიება თვითმკვლელობამდე მიყვანის მუხლით უნდა განახლდეს და დასახელდნენ პირები, რომლებმაც ახალგაზრდა ქალი სუიციდამდე მიიყვანეს.
"საჩივარი შევიტანეთ. როგორც მოგეხსენებათ შოთაძემ ყველაფერი გააყალბა და ყველაფერი გააკეთა იმისთვის, რომ საქმე არ გახსნილიყო. ვითხოვთ, რომ გასაჯაროვდეს ყველა ის ჩანაწერი და დამტკიცდეს რაც მოხდა სინამდვილეში. მაშინ ქოლ-ცენტრების თემა ახალი ხილი იყო, მაგრამ სულ ვამბობდი, რომ ლილუაშვილი არის ამ საქმეში ჩართული და სასაცილოდ არ ჰყოფნიდათ. როგორც აღმოჩნდა, თურმე სათავეში ყოფილა და თვითონ ჰქონია ის ქოლ-ცენტრები. ზის ციხეში და იმის მოლოდინიც მაქვს, რომ დაუმძიმდეს სასჯელი, თუკი რამით აქვს წვლილი მიღებული თამუნას ამბავში", - განაცხადა ბაჩალიაშვილის დედა, თეონა თამაზაშვილმა ["ფორმულა"].
შეგახსენებთ, 23 წლის თამარ ბაჩალიაშვილი 2020 წლის 18 ივლისს გაუჩინარდა. ის რამდენიმე დღის შემდეგ, თეთრიწყაროს ტყეში, საკუთარ მანქანაში გარდაცვლილი იპოვეს. გამოძიების ინფორმაციით, ბაჩალიაშვილმა სიცოცხლე თვითმკვლელობით დაასრულა და საქმე დაიხურა.
