უკრაინის პრეზიდენტი ვოლოდიმირ ზელენსკი კიევში ამერიკელ სენატორებს რიჩარდ ბლუმენტალსა და შელდონ უაითჰაუსს შეხვდა, რათა რუსეთის წინააღმდეგ სანქციების გამკაცრება, ფრონტზე არსებული ვითარება და მოლაპარაკებების პროცესი განეხილათ. ინფორმაციას უკრაინის პრეზიდენტის ადმინისტრაციის პრესსამსახური ავრცელებს.
„ჩვენ ძალიან ვენდობით თქვენს გადაწყვეტილებას, თქვენს მომავალ გადაწყვეტილებას. იმედი მაქვს, სენატი მხარს დაუჭერს სანქციების შესახებ კანონპროექტს. ეს ჩვენთვის ძალიან მნიშვნელოვანია.
ჩვენ ვერ ვხედავთ ბევრ ინსტრუმენტს პუტინზე გავლენის მოხდენისთვის, რუსეთზე ზეწოლის განსახორციელებლად, ამ ომის შესაჩერებლად. ნომერ პირველი ინსტრუმენტი სანქციების პოლიტიკაა“, - თქვა ზელენსკიმ.
ზელენსკიმ ხაზი გაუსვა აშშ-ევროკავშირის აქტიური თანამშრომლობის მნიშვნელობას რუსული ჩრდილოვანი ტანკერებით გადაზიდული ნავთობის კონფისკაციის საკითხთან დაკავშირებით.
უკრაინის პრეზიდენტმა სენატორებს ასევე მიაწოდა ინფორმაცია ჟენევაში მომლაპარაკებელი ჯგუფების შეხვედრისთვის მზადების შესახებ.
გარდა ამისა, შეხვედრის დროს მხარეებმა დაგმეს რუსეთის თავდასხმები და ხაზი გაუსვეს, რომ რუსეთმა პასუხისმგებლობა უნდა აგოს აგრესიის დანაშაულებზე.
„ჩვენ ცალკე განვიხილეთ გაყინული რუსული აქტივების უკრაინის საჭიროებებისთვის გამოყენება. მიზანშეწონიელი იქნებოდა მათი გამოყენება Patriot-ის სისტემებისთვის რაკეტების შესაძენად, რამაც შეიძლება გააძლიეროს უკრაინის საჰაერო თავდაცვა“, - ნათქვამია უკრაინის პრეზიდენტის ადმინისტრაციის მიერ გავრცელებულ განცხადებაში.
შეხვედრის დროს მხარეებმა რუსეთის მიერ გატაცებული უკრაინელი ბავშვების დაბრუნების მცდელობები განიხილეს. ზელენსკიმ დასძინა, რომ უკრაინელი ბავშვების დაბრუნების საერთაშორისო კოალიცია პარტნიორებთან შეხვედრებს ბრიუსელსა და შეერთებულ შტატებში გამართავს, რომელშიც შეერთებული შტატების პირველი ლედიც მიიღებს მონაწილეობას.
რიჩარდ ბლუმენტალმა რუსეთიდან დაბრუნებულ უკრაინელ ბავშვებთაბ შეხვედრაზე ისაუბრა და ხაზი გაუსვა, რომ შეერთებულმა შტატებმა რუსეთის წინააღმდეგ დამატებითი სანქციები უნდა დააწესოს და უკრაინის საჰაერო თავდაცვა გააძლიეროს.
„ჩვენ ახლა ძალიან მტკიცედ ვართ გადაწყვეტილი, ვიმუშაოთ სანქციების ხაზზე, ბავშვების დაბრუნების ხაზზე, „ტომაჰავკებისა“ და ამჭრელების მიწოდებაზე - ყველაფერზე, რაც გამარჯვებისთვის არის საჭირო. და იმ ცრუ ნარატივების წინააღმდეგ ბრძოლა, თითქოს რუსეთი იმარჯვებს. ის არც ბრძოლის ველზე იმარჯვებს და არც მორალურად“, - თქვა ბლუმენტალმა.
